《魚缸博客》特首宣讀任內第三份《施政報告》，一如預期地唔肯減股票印花稅，但生發發
（００３８８）都無乜反應，擺明一切盡在預期，賣地收入唔理想，香江政府要開源節流，要放
棄印花稅收入預咗會面臨阻力。事前大把孖屐中人都預期今次「無料到」，睇《施政報告》不如
等睇上面政策仲好。既然係咁，不如就睇吓內房股。
　　國新辦公布，聽日（１７日）住建部將會聯合財政部、人行舉行新聞發布會，由住建部部長
倪虹牽頭介紹「促進房地產市場平穩健康發展」等等有關情況，雖然之前連續兩次記者會都無乜
跟進政策出台，但今日（１６日）再次多部門一齊開記者會，令孖屐又有啲心雄，再次炒起內房
股。
　　確實無水晶球可以預測聽日個會有無料到，但今日明顯內房股升勢係比起上兩次記者會興奮
得多。另外，ＬＰＲ調整結果下星期二（２２日）公布，不過好多分析都表示，會唔會再減息要
視乎今個星期五嘅經濟數據，不過美聯儲減息步伐要放慢，再加上神州之前已經減咗存量房貸利
率，所以短期內再減嘅機會唔係太大。
　　目前內房股回落咗咁多，總會吸引人想再博一次。上次嚟講就以融創（０１９１８）、世茂
（００８１３）呢啲前民營龍頭升得比較多，今日見到都係比較多人博入嘅股份之一。想穩陣啲
嘅就萬科（０２２０２）、龍湖（００９６０）之類嘅安全牌，最博嘅不妨揀旭輝
（００８８４）、奧園（０３８８３）之類嘅細價毫股，但注碼方面一定要自己控制好！
　
《編者按》本欄搜羅即市傳聞，惟消息未經證實，《經濟通》亦不保證內容之準確性。

【你點睇？】《施政報告》提出醫療改革，盧寵茂表示日後普通科門診擬只接受弱勢群體，你是否支持？► 立即投票