選戰平淡落幕，塵埃早已落定，林鄭新皇準備登基。一切按劇本進行，雖然如此，但喺各方都有走票嘅情況出現之下，我諗無人估到最終得票會係比上屆更加神奇嘅數字「777」。公佈一刻，支持者歡呼，薯片、法官黯然，新女皇就面露一下不悅，之後繼續接受歡呼聲嘅簇擁。佢可唔可以團結到香港人？我唔知，但佢當選呢刻好難得令兩極化嘅港人都面露一刻歡顏，因為777呢個數字，點樣解釋都悉隨尊便。

 

 

　　全力撐佢嘅，就大肆宣揚「香港中jackpot」，如果係教徒，就可以話係上帝嘅旨意，因為7喺基督宗教之中，代表「完整」，而家仲要有3條7，又加強咗林鄭當初「係上帝叫我參選」嘅合理性啦，對佢嚟講係可喜可賀架。反對林鄭嘅，見到林鄭當選當然不是味兒，但係呢個數字，一望到就笑出嚟。呢個數字係會跟林鄭一世，但當然啦，都只係茶餘飯後嘅笑話一則，反而，777，正正提醒返大家，林鄭喺參選期間嘅各樣瘀事，有幾咁「__」。大家就以此聊以安慰，嘲笑689 2.0進化成為「林鄭三7」，覺得佢得到呢個票數係好貼題，係天意。

 

　　平心而論，經歷七七四十九件事，例如：唔識用八達通、去便利店發現冇廁紙買、故宮館陷入一個個程序危機、因為太攰而唔去天水圍見街坊等等，林鄭喺當選嗰刻傲氣比起當初唔選又選嘅時候削弱咗不少，但係離地、自負，並唔係一時三刻有得改走。

 

　　喺求學時期攞慣第一嘅林鄭，當選成為香港第一人，當然要「衣錦還鄉」，返自己母校一趟，好好多謝呢個孕育自己嘅地方。探完母校，跟住就落咗去灣仔利東街呼吸「偽歐陸」空氣，負責主理利東街重建項目嘅林鄭，讚嘆一句：「而家無車，幾好行」跟住就行入一間貴價餅店，做咩呢？

 

　　原來係買餅派畀記者， 但camman大哥們都因為影緊相，所以顯得唔太領情，林鄭伸手派，camman們就後退。777特首就好尷尬咁問記者們做乜向後退，camman們回應：「太近影唔到呀。」整個氣氛變得好奇怪，一來記者們做緊嘢，其實唔應該接任何禮物，二來林鄭都冇考慮清楚嗰個場合應唔應該咁做，只係好自然、有點天真咁話派就派，有遊客市民衝入嚟想同佢自拍，佢又要應酬埋人哋，咁呢個場合究竟係要影相，定係已經完成任務嘅off-record傾談呢？呢件事某程度上反映林鄭心急想同傳媒打好關係，但係方法用得好古怪。最尷尬，就係佢嘅候任辦新聞秘書提佢，話有小朋友想攞塊餅，林鄭好清醒咁話：「唔得呀，唔係畀市民架，呢啲係畀記者架！」佢好睇重啲餅，我明白，但慰勞記者，原來就係值一塊餅……

 

　　未打好同傳媒關係，同「前同事」們嘅關係似乎都係一個障礙。選前有眾多風聲傳出，如果林鄭做特首，會有唔少高級公務員劈炮，以對林鄭嘅工作方式表示不滿，空穴來風，林鄭嘅強硬同一往無前，比起689有過之而無不及，呢種傳言最後係咪真係發生呢，就拭目以待。擺喺枱面嘅，林鄭想為取消「BCA」找數，都展現林鄭喺民望戰上「欲速則不達」嘅無奈。佢點會估到，呢五年嚟同自己合作無間嘅上司，會一手就將佢呢個找數夢扼殺？

 

　　如果想打好民意戰，搵返曾俊華入閣，可能係一個好好嘅選擇，畢竟佢已經成為建制派當中嘅吉祥物，但相信自負嘅林鄭唔會有呢個諗法，曾俊華亦都樂得清靜，傳說中好開明嘅中央更加唔會畀呢位輸家以高民望「潛伏」喺政府裏面。

 

　　所以，都係發吓夢算啦。

 

 

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇