大陸收返香港，咁就過咗二十個春與秋。每逢五年、十年，按大陸官場習俗，一定會大搞慶祝活動粉飾太平，呢個係2007年時任民政事務局局長嘅何志平講嘅一個潛規則。嚟到今年，社會空前咁「和諧」，人民空前咁「擁戴」政府嘅時候，香港政府當然唔會例外，一定要大灑金錢，令大家洋溢喺歡欣嘅氣氛入面，等大家忘記過去五年嘅傷痛。

 

　　6.4億公帑，話多唔多，話少唔少，政府話要批出呢一個款項，畀各大小政府部門以及民間團體，舉行一系列慶祝活動。官方出新聞稿，就話為「慶回歸二十週年」 ，一共有超過320項慶祝活動，但睇返政府特別設立嘅網頁就一共列出咗543項活動。睇完個表，我簡直覺得粒粒皆星，樣樣精彩，洗埋腦，覺得全香港730萬人喜氣洋洋展歡騰咁慶回歸喎。

 

　　有一啲活動都算貼題，我諗佔10%左右啦。例如啲基本法問答比賽、邀請英超球隊、NBA呢啲來港作賽獻技，又或者慶祝香港特別行政區成立20周年郵票展覽等等等等……其實搵好辛苦，真係睇晒成個list都無乜邊個係同「回歸」呢個命題直接相關。無可厚非嘅，佢都係為粉飾太平，咁開開心心都算係慶祝嘅……

 

　　剩落嚟嘅九成活動，都畀人一種感覺…嗯…你話關事咩？我肯定啲參加者唔會聯想到中國收返香港嘅「喜悅」。粗略咁將啲活動分為三類，就會明白，點解一向都擁護政府嘅建制派議員張華峰，都會同大家講，見到個活動列表會「一頭霧水」。

 

　　第一類：咩活動都當係慶回歸，好似冠名贊助咁

 

　　有一堆活動嘅名稱，一開始都加咗「慶祝回歸20周年」呢幾隻字，例如「慶祝香港回歸祖國二十周年–短期職業體驗計劃2017」、「『慶祝香港特別行政區成立二十周年』第六十九屆夏季贈醫贈藥會」，好似加咗呢幾隻字，就好貼題咁樣，但見到個節目，大家都心知肚明，只係政府出咗公帑贊助。另外仲有一堆「論壇」、「研討會」，講廉政，講消防安全，講公司註冊，哈，係咪講講吓會喺度數呢20年呢啲方面香港倒退咗幾多？

 

　　另外又留意到一個叫「馬勒與孟德爾遜」嘅音樂會，佢嘅節目簡介係咁寫嘅：「本樂季的馬勒探索之旅以其第四首交響曲作結。同場，13歲的王雅倫將演奏孟德爾遜第一鋼琴協奏曲，為觀眾帶來如夢似幻的晚上，藉此共慶回歸。」其實無咗臨尾嗰六隻字，本身節目嘅原意已經帶出咗，聽交響樂點樣有慶回歸嘅喜樂心情？ 呢個真係要問吓有份演奏嘅人有冇呢份心意啦。

 

　　第二種：每年都會有嘅活動，慶回歸三隻字一咪靠黐

 

　　海洋公園40週年、法國五月、渣打馬拉松，原來都關事？例如海洋公園，其實只係咁啱都係7字尾嘅年份，唔關你回歸事架喎。仲有一堆節日相關節目，農曆新年、端午節、中秋節，各區議會搞嘅節日活動其實年年都有，但一有「慶回歸」三隻字，政府又派funding畀佢哋啦，政府錢真係易搵。

 

　　第三種：本身都應該成日做，但係偏要慶回歸時節先做

 

　　呢一類活動，首推政務司司長張建宗所講嘅「落區」，啲局長高層官員會落區派福袋畀貧苦大眾。噢，原來唔慶回歸，啲官員就唔識落區架啦，難怪每個官員都離地離到上天花板。

 

　　然後嗰啲「清潔三無大廈」、「荃城清潔」公民清潔活動，不嬲都應該做。偏偏要巧立名目，去到呢啲時候先搞，又難怪大家都話，慶回歸所以要「清洗太平地」啦。

 

　　不過，都唔係個個活動都可以獲得政府「寵幸」攞錢架，長洲太平清醮就無啦，因為佢哋會有飄色巡遊，成日攞政府啲官嚟做諷刺，出晒名反映現實，同政府希望建立嘅平行時空完全唔同，所以負責設計巡遊裝飾嘅惠海陸同鄉會飄色總監黃成就接受傳媒訪問嗰時就話，曾經收到指示，今年回歸20周年，會景題才最好歌舞昇平。但黃成就都透露，已經決定會由小朋友扮林鄭，攞住八達通，腳踩大廈模型諷刺樓價高企。毋須慶回歸，反映現實最緊要。

 

　　與其嘥6億，我認為最好嘅慶祝活動，就係「回歸」返最原先嘅初衷，畀香港人管好自己嘅香港，畀香港人自己揀返自己嘅領袖，回歸返兩制嘅設計，咁樣唔使慶祝，大家都已經開開心心。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

樂本健【年度感謝祭】維柏健及natural Factors全線2件7折► 了解詳情