梁振英喺「浩鼎門」之後，死咬住梁繼昌唔放，更加連續八日寫blog聲討，真係令到唔少香港人「士可忍孰不可忍」。Tina第一個印象，都係覺得CY好似「熱窩上的螞蟻」，出招出到亂晒龍。

　　一位熟悉國內政圈嘅老前輩同Tina閒聊呢單料時，就今次「事件」高度肯定梁振英；唔係肯定佢嘅解難能力，而係讚揚佢嘅政治能量同政治決斷力。佢話，CY每一步都係計得清清楚楚，唔會虛走任何一步。首先，周浩鼎衰咗已經係事實，周亦肯定成為棄子，CY第一時間攻擊梁繼昌係可以一石二鳥，第一可以轉移佢串通專責委員會副主席呢個話題，能夠拉梁繼昌落馬固然係拎到分，拉唔到，亦可以將自己塑造成為一個「被逼害者」。第二隻鳥，就係希望梁繼昌喺回應之時有啲咩出錯，等日後誹謗案對原告CY有幫助。

　　不過，老前輩就話以上所有呢啲都唔係CY嘅最終目標。CY就同指南針一樣，支針永遠只係識得指向北面。佢解釋，由CY宣布唔競逐連任之後，左手揸實「一帶一路」超級聯繫人嘅角色、右手就攬住大灣區發展新形勢呢兩個國策，連出席相關活動都可以唔預林鄭，真係「CY梁之心路人皆見」。

　　「佢咁做目的就係要增加佢卸任特首後，國家對香港事務嘅影響力。但我相信，一個政協副主席都唔能夠滿足佢嘅野心。你諗下，現時政協有22個副主席，CY只係廿二分之一…」Tina即時插口：「唔係要做政協主席呀？！佢係香港人喎，點做主席？」前輩就話，想當年董伯伯做副主席都係前無古人，想當年亦都無人估CY會做到特首，如果問CY想唔想做政協主席，肯定佢心入面係好想好想。如果佢能夠做好「一帶一路局長」、「大灣區區長」嘅工作，無話無可能；但如果UGL事件一直喺CY尾巴跟住踢唔走，機會就真係好渺茫。

　　老前輩仲話，「呢排CY嘅舉動，有媒體話佢係「狗急跳牆」、有議員話佢係發晒癲，但其實佢同圍棋電腦一樣，計好晒每一步棋。佢係唔會理香港人點睇佢，佢只係會關心北面點睇佢！」

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動