剛剛又過咗一個暴力嘅周末，都係唯一嘅老問題，政府往往落後於形勢，無及時回應示威者訴求，一直利用警隊去「武力」處理複雜難解嘅政治議題，最終只會繼續將警察同示威者及支持雙方民眾之間嘅仇恨擴大，雙方武力、衝突不斷升級，個結更加難解。

　　以上一切一切問題嘅根源，係來自特首林鄭月娥同特區政府。今次由一個修例演變至全港政治風暴，港鐵站爛咗幾個月可以修理好、同屋企人關係差咗都可能有機會慢慢修補，但今次政治風暴正正係揭露咗主事香港嘅官員以至係現有政治制度係幾咁不堪，令到香港對外嘅信用度大跌。喺內地，個人「信用評級」差，買唔到機票、火車票，香港「信用評級」差，喺國際社會上嘅聲譽立竿見影。

　　上周路透社公開咗佢地之前得到嘅林鄭錄音聲帶，其中有一段佢提到，曾經搵咗八間國際公關公司，就政府公關工作提出建議，其中四間收到呢個「Pitching」時竟然係立即拒絕，其後有兩間亦都拒絕會見。四間立即拒絕嘅公關公司，理由係「支持香港政府有損其聲譽」；睇到呢句，Tina真係笑咗出來，但絕對係苦笑，因為一個國際金融中心嘅政府，竟然淪落到畀打開門口做生意嘅國際公關公司唾棄，立即拒絕政府嘅邀請，呢舊檸檬未免太大舊。

　　呢單都唔止，仲有港交所(00388)收購倫交所單料，倫交所收到收購要約之後短短「一日」咁大把，就即刻叫港交所「過主」。倫交所嘅拒絕信羅列多項理由，但Tina特別留意到其中一句，中文意思係「港交所與眾不同的董事會架構及與港府的關係，會令併購變得更加複雜」。英國人講說話向來著重修辭技巧，講到係讚緊你咁但實情就係奚落你一番，倫交所呢個理由真係白到唔白，就係唔信任香港政府、黐埋去係令到形勢更複雜，正正又係打咗港府一個耳光。

　　政府無能力處理亂局，畀外國人感到月薪高過美國總統嘅特首辦事能力有限都係其次，連區區一個立法會議員宣誓時搞三搞四都可以無得撈，但搞出咁大政治風波，成個政府竟然可以無任何一個問責官員問責下台，喺外國人眼中，又點會係一個有信用嘅政府？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇