上星期五(5日)，喺疫情仲未全面退卻之下，中聯辦舉辦咗史上第一個新春酒會，同香港各界拜一個早年。中聯辦新春酒會，之前年年都搞，風平浪靜之時，大家碰碰酒杯底，閒話家常咁，當然就唔多會有特別新聞價值，但經歷咗整整一年嘅疫情但係香港爆完又爆新一波、再加上去年中訂立埋《國安法》，今年新春酒會中聯辦主任嘅「致辭」，就絕對唔係例牌咁簡單。

　　中聯辦主任駱惠寧上星期五嘅致辭，題目係「讓香港這個家變得更好」，望上去就係年年都啱用嘅萬能Key，但係細味佢嘅內容，就明顯感覺到同以往嘅分別。駱惠寧對香港有「四個判斷」，包括：「一國兩制」方針不會變， 堅持「愛國者治港」，堅守「一國」原則，及「落實中央全面管治權」。

　　佢亦指出要堅決執行《港區國安法》，堅持喺法治軌道上彰顯民主自由，拒絕落入泛政治化漩渦。第三點，亦係Tina認為最重要嘅一點，就係駱特別提到，「發展經濟改善民生步伐會加大，要求拿出更加精準有效施政措施，逐步破解就業、收入、土地、房屋、醫療等重大民生問題」。駱最後就指出，香港要融入國家及大灣區發展機遇。

　　第三點之所以係Tina認為最重要嘅一點，就係之前中聯辦主任呢類嘅講辭，係因為喺「一國兩制」之下，甚少特別提及香港嘅內部事務。遠嘅唔講，講返兩年前2019年初，反修例事件都未出現嘅時候，時任中聯辦主任王志民致辭時當然係力讚林鄭帶領特區政府堅定維護一國兩制、憲法同埋《基本法》，勇於擔當、積極作為，有關屬於香港特區嘅內部事務，只係輕輕帶過，話林鄭「聚焦發展經濟，改善民生，著力破解事關廣大居民的切身利益問題」，得到中央肯定等等。

　　兩者最大分別，就係今年講到明你施政要更加精準(暗底嗰句就係話你依家唔精準)、改善民生步伐要加大(暗底嗰句又係話你依家未夠力水)，好明顯就係阿爺對於林鄭政府嘅施政成績有不滿嘅地方，更要透過中聯辦主任去出聲。從以往阿爺擔心畀輿論話破壞一國兩制而甚少對香港內部事務出聲，到今年講得咁淺白，好明顯就係喺未來施政上面唔單止要加大「一國」角色，更可能喺某啲施政上面，中聯辦會有更深入嘅「指導」。

　　有建制派議員指出，近月喺個別議題上面，已經見到個別建制派議員配合親中媒體一齊出動，包括整治港台、推動司法體制改革等等，唔多唔少都可能係中聯辦嘅意思。佢亦都估計，未來只會有更多香港本地事務係要徵詢中聯辦嘅「意見」，相信佢地嘅角色只會愈來愈吃重。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇