李家超的重責

　　日前媒體傳出政府將會出現人事變動，周五（25日）國務院果然就公布，根據行政長官林鄭月娥提名同建議，決定任命李家超（前保安局局長）為政務司司長，鄧炳強（前警務處處長）為保安局局長、蕭澤頤為警務處處長，同時免去張建宗政務司司長職務。

(Tim攝)

　　今次高層任命，可以話係政壇「震撼彈」。震撼地方有兩個，一個係「時間」，另一個係「人選」。

　　先講「時間」。現屆政府仲有一年左右就完結，下年3月就會有特首選舉。按照一般做法，或者係按照正常人嘅諗法，除咗有人因為健康而要離職要其他人頂替之外，現政府確實係應該「不變應萬變」，偏偏今次要牽一髮動全身，升三走一，其中一個職位更加係第二把手嘅政務司司長，確實係「有啲嘢」。

　　點解仲有一年都要作出變動？政圈中人普遍相信，得返一年都要變動，好明顯就唔會係出於林鄭之手。換一個角度睇，如果阿爺都未諗得定下一任特首邊個去做，林鄭遞張升官晉爵表畀阿爺，阿爺會唔會批？九成九唔會，乜都留返下一任上場先講，所以今次呢幾個變動，特別係政務司司長、保安局局長呢兩個位，好大可能係阿爺嘅意思，而新一任特首無論係林鄭連任定係有新特首，呢兩個官位會變動嘅可能係零，即係會一路延任至下屆政府。

　　「人選」方面都可以間接引證「時間」嘅推論。林鄭周五見記者，話三個職位都係出於佢嘅意思、係最佳嘅人選，唔好話政圈中人，真係細路哥都呃唔到。林鄭作為AO出身，又做過政務司司長，佢知唔知政務司司長責任喺邊？政務司司長等於係一間公司嘅CEO，掌握公司生存命脈，舉個例子匯豐銀行要搵CEO的話，會唔會搵一個保安公司前高層去做？百分之一百無可能，林鄭做咗大半世AO同問責局長，更加係心裡明白。呢個位要喺現任局長到搵人頂上的話，齋睇CV，排五六個人都未必排到去李家超，顯而易見，建議無可能出於林鄭之口，一定係阿爺嘅意思。

　　既然係阿爺熟意要喺呢個時候咁調動，一下子提拔「平亂」有功嘅李家超任特區第二把手、鄧炳強出任保安局局長，發出嘅訊息都明顯不過，再加上李家超早前接受媒體訪問時主動提及23條修例今屆政府未有足夠時間完成，估計李同鄧嚟緊嘅任務非常簡單：喺未來一屆政府做好23條立法，就係打好咗呢份工、為國家立大功。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇】機場日前電腦系統故障，航班資料僅靠手寫白板，有旅客錯過航班感到失望，你認為機場處理手法是否妥當？► 立即投票