【職場中的狼來了】以為口講唔需要成本？ 其實你在消耗自己的信用值

　　職場上有太多人只會說話，但不會做事。

 

　　當你同呢類人認識得耐，你就會自動將佢哋講嘅說話「打折扣」，例如佢話佢有個project同其他partner傾得如火如荼，準備大展拳腳，你心裡大概只會相信六成，因為你經歷過太多次事實與描述不符，好多時甚至不了了之。

 

　　好多人覺得「口講唔需要成本」，所以喺人哋面前咩都講大啲，型咗先算。但久而久之，呢類人喺其他人心目中嘅信用就會被消磨。大家雖然唔會將呢個心態上嘅轉變講出口，平日相處可能仍然有講有笑，但去到重要事情需要做抉擇或搵幫手時，佢嘅說話，甚至佢嘅存在都變得可有可無。

 

 

　　講說話其實需要成本，而呢啲成本就係你嘅信用。正如狼來了嘅故事，當大家一次又一次被欺騙，小男孩嘅信用就咁跌落谷底。相比言過其實，我寧可大家做個沉實嘅員工。如果不善言辭，你大可專注做好工作，然後用工作表現為自己說話。

  

　　有啲事開大咗個頭，過程中花時間解決、掩飾，其實仲攰過OT、仲難過紮紮實實做好工作。事實大多都一目了然，並唔需要特別解釋。

 

　　信用需要長時間辛苦累積，但要令信用破產，只需要一兩次錯誤就可以 —— 面對同事overcommit、面對老細詞不達意都足以致命。信用將伴隨大家一直「行走職場」，就算你離開一間公司，你嘅事跡仍可能流芳百世。

 

　　就好似我一個舊同事 Christopher。

 

　　Christopher 係公司入面有名嘅吹水sales。每次佢同客人傾電話都甚富娛樂性，一眾同事一知佢sell客，都會坐定定洗耳恭聽。Christopher 最叻斷章取義，並且成日將自己嘅闡釋當成事實咁同其他人講。慢慢，「Christopher」成為咗呢間公司亂咁吹水嘅形容詞。

 

　　當時，大家只要講「做人別太 Christopher」，一眾同事都會會心微笑，並且以此為尷尬。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇