【辦公室吹水王】總有一個在左近！對付吞pop同事，一定要……

　　好多人好鐘意喺 office 吹水，適量適時咁吹水的確可以調劑緊張工作情緒，放鬆心情。

 

　　但有啲同事喺 office 吹水，的確吹得有啲過份，甚至吹到走火入魔─返工返十點，行埋自己位攞起水杯行入pantry，例必一路洗杯一路吹水。沖好咖啡返埋位，又已經十點九。喺自己位check email十五分鐘，佢又會行過隔離 team 吹水，所以經常有同事行過嚟搵佢都會「摸門釘」。不經不覺，又到lunch time，佢返埋位攞銀包，就同其他同事有講有笑咁離開office。一個朝早，佢真正喺位做嘢嘅時間可能得半個鐘。

 

 

　　我發覺呢類人每次吹水都有無窮無盡嘅話題，由公司是非、娛樂圈八卦消息，到仔女返學、用邊部吸塵機都無所不談。由於呢類同事已經係專業級水平，所以我會稱佢哋為「辦公室吹水家」。

 

　　上個月，我公司因為唔夠位坐，所以要加多幾張hot desk，因而造就我同一個「辦公室吹水家」嘅互動。以下係我兩個星期以來嘅觀察：

 

　　吹水家經常有意無意咁話畀人知，佢其實好knowledgeable，無論係公事定時事，煮飯定買機票去旅行，佢哋都非常踴躍發表意見，從而顯示自己見識廣，有啲嘢係佢識你唔識。

 

　　吹水家最叻未必係把口，而係對耳，因為佢哋無時無刻都聽緊四周圍同事嘅對話。有時佢哋看似專心做緊嘢，但一聽到啱嘅話題，就會擰轉身加入討論。而佢哋經常可以做到無縫插入對話，顯示佢哋非常留意四周對話嘅一字一句。

 

　　同好多小朋友一樣，吹水家係一名 attention seeker，經常希望得到別人嘅關注。所以如果你希望減少大家喺 office hour 過多互動，影響工作效率，可考慮採取「故意忽略」策略（Planned Ignorance）。故意忽略係一種專登唔去理一個人嘅態度，你嘅目光、你嘅身體語言要有意無意咁避開想同你吹水嘅同事。如果佢真係開口打開話題，你可以較冷漠咁回覆一句「啊，係咩」或者一聲「唔」。嘗試以「一隻手掌拍唔響」嘅原理，令佢意識到你需要專心工作。

 

　　面對「辦公室吹水家」，你又有咩應付良方？歡迎留言分享。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇