做高層唔使「太勤力」？勿忘記高層真正價值，掌握3個生存之道！

　　工作到某個職級，好多人都會遇到樽頸位而令佢哋永遠唔能夠再升上去，再努力工作都係與高層「無緣」。就算最後好彩地捱到高層之位，但亦會因為唔懂作為高層嘅技巧，只用以前打工仔「死做爛做」嘅策略，最終亦未能「坐穩」，繼而係多方面壓力下被人淘汰。

與高層共處

　　好多公司高層都鍾意明爭暗鬥、殺過你死我活，希望踢走所有「敵人」後，成為一人之下萬人之上。但事實係，作為高層好難永遠自己一個「擔大旗」，做到亦難以持久。所以做高層首要學習如何同其他高層於刀鋒下共處，一齊合力服侍老闆先係雙贏對策。要同其他高層「和諧」共處，必先講價值，所有能夠坐穏嘅高層都有佢哋自己獨有價值。如果大家嘅價值出現重疊，就會經常發生衝突。相反，如果大家懂得避開對方嘅價值，或擁有自己獨有價值，高層間嘅角力就會變得微妙。就算你好憎其他高層，但亦唔想佢哋離開；就算你好想領功，但有時亦會為他人留下攞彩嘅機會。最後你會發現，有時你做上靶／下靶，有時又會互換上／下角色，大家互利互用，先係高層生存之道。

少用人脈

　　「識人好過識字」呢句話，係職場上永恆嘅定律，尤其當你喺行頭做得愈耐，人脈慢慢變得愈重要。人脈多當然係好，但其實最重要係如何善用人脈嘅同時，亦唔會因過量使用而換來反效果。人脈係一種「借來的東西」，當你利用人脈向對方換取利益，同時間對方亦會判斷你嘅價值所在而計算將來不同嘅回報。「借得」當然要還，但如果借咗唔還或過分「借貸」，除咗會引來對方嘅反擊之外，亦會令人覺得呢位高層只靠其他人，而唔係靠自己。一位過分依賴人脈嘅高層，久而久之令人覺得佢係冇實力嘅空心菜，失去人脈及下屬嘅支持，最後只有離職收場。

不用太勤力

　　以前做低層／中層打工仔時，會以「時薪」同「工作量」作單位，「返咗幾多個鐘頭工」、「放工／放假OT咗幾多小時」、「一個人頂咗幾多個job」等等，以作升職加薪嘅籌碼。但當你做到高層，或者開始步入高層嘅階段，唔再講「時薪」或「工作量」，而係講「決定」同「價值」。你能唔能夠承擔重大決定、每個決定為公司帶來幾多價值，先係你真正嘅KPI。職場上每一次升職，其實職能比重會不停改變，由以前「好多execution、好少management 同decision making嘅工作」，會慢慢變成「好少execution、但好多management 同 decision making嘅事情」。現今仲有好多高層唔懂得轉型，每日只會埋頭苦幹不停OT，但忘卻自己嘅真正價值。其實公司已經唔再需要你嘅「努力」，而係要你嘅「腦力」。

　　高層係全公司最top職位嘅員工，但唔代表係工作能力最高、年資最長嘅員工。但其實能夠係任職期間，坐得最穏、最安寧，先係最「有效」嘅高層。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【與拍賣官看藝術】東南亞藝術市場是下一個熱點？一探各地獨特及吸引之處！► 即睇