《Make Money》NFT、李寧鞋、積木熊，奇怪炒賣你聽過未？

　　香港人最叻就係炒炒賣賣，不論炒樓、炒股、炒金、炒波鞋、炒電話、炒郵票甚至街邊炒栗子果個都同你分享炒賣心得，皆因「工字不出頭」！不過，世界變得咁快，原來好多新嘢都有人炒，有啲仲好新奇有趣，你聽都未聽過添！

 

（Shutterstock圖片）

 

區塊鏈技術成熟，NFT虛擬資產成炒賣新潮流

 

（Shutterstock圖片）

 

　　比特幣你可能聽得多，區塊鏈你都或者聽過，但NFT就真係新潮嘢啦！區塊鏈有不可修改、可加密特性，而一般虛擬貨幣屬「Fungible Token」（同質貨幣），即每一枚之間無本質分別，用以交易、切割；而Non-Fungible Token（非同質貨幣，NFT），即每一個都獨一無二且不可替代，，其擁有者可視之為「僅此唯一」。

 

　　舉個例，去演唱會要買飛，呢張飛就屬於個演唱會嘅Token，每一張飛之間無本質分別；而NFT嘅Token就係儲存係區塊鏈上獨一無二嘅數字資產，因為區塊鏈有透明公開嘅特性，雖然人人都可以睇到呢個資產屬於邊個人，但只得一個人可擁有。好似Twitter創辦人Jack Dorsey，就利用呢種技術拍賣自己係Twitter上第一個貼文，最後炒到以291萬美元賣出！

 

　　係往後，藝術家都可以利用到NFT技術，將自己嘅藝術作品有限量地賣出，每一件虛擬藝術品都有一個屬於自己嘅Token認證，無得呃啦！而科技界人士估計，假如未來區塊鏈技術成熟，NFT可以應用係房屋、汽車等實體買賣！

 

李寧波鞋都有得炒，唔通國貨開始崛起？

 

 （Shutterstock圖片）

 

　　早前內地因為新疆棉花風波，一時引發抵制Nike、Adidas鬧劇，唔著外國牌子咁著咩好？中國人就梗係著「李寧」啦！國產波鞋呢一期都可算係出盡威風，係本月初多對李寧同安踏波鞋都出現炒賣情況，甚至有李寧波鞋由發售價1499人仔，係內地得物APP平台炒到上近五萬人仔。

 

　　呢種炒賣風氣，阿爺梗係要出兩句聲，新華社發表文章指，借機哄抬「國貨」價格屬「自斷門路」。一收到風，得物APP已經將相關炒賣商品下架，據了解呢次炒賣風氣係個人帳戶行為，並無造成成交或極小量買交成交；而另外20款炒賣比較波動嘅商品都同樣下架處理。

 

　　點解有炒賣？就係因為有需求，不過學領導人語氣話齋：「鞋子是要來穿的，不是用來炒賣的。」其實李寧波鞋嘅款色都唔差㗎，不過炒到咁貴點買得落手呢？

 

日本物流停晒，「積木熊」原價2千變3萬

 

（Shutterstock圖片）

 

　　如果大家有留意開潮流玩意，應該都有睇過「積木熊」（Bearbrick），有人叫「暴力熊」，係由日本MEDICOM公司推出，2001年起正式發布，已經經歷好多代，因為佢同唔同嘅卡通人物或者藝術家聯乘，加上有保值作用，就算係日本都係抽籤形式同限量發售，都依然唔少年輕人都喜歡收藏。

 

　　不過，由於日本目前都半封閉狀態，物流都已經幾乎停晒，買家想要買到積木熊已經難上加難，係內地買賣交易平台可以搵到百幾蚊至十幾萬嘅相關產品，一隻原價2千蚊人仔嘅積木熊被炒上3萬，真係沒有最誇張只要更誇張。提醒返，炒賣呢類玩具性產品風險極高，好似香港以前有人炒賣過快餐店推出嘅玩具，如果佢物流通返或者突然增加產量，咁價值就有機會大幅下跌，到時就真係喊都無謂啦！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】美國總統大選在即，你認為誰將最終當選？► 立即投票