【舖市寒冬】直擊一街25間空舖夾公仔店攻旺區

2020-01-22

租戶篇：夾公仔店民生區擁6店趁低租部署旺區擴張

　　走到銅鑼灣、尖沙咀、旺角等傳統旺區，抑或在西灣河、紅磡、荃灣等民生地區，均會發現不少吉舖變成夾公仔機舖，一部又一部夾公仔機充斥街頭巷尾。夾公仔機舖入場門檻低，在經濟不景氣下，發展日趨蓬勃。

靠與客互動贏口碑

　　一年前，利紹豪和張弘與4位朋友合資開設首間夾公仔店Take Me Out，看好夾公仔行業前景，毅然入行。他們經營「家庭式」夾公仔機，主攻家庭客，希望連小朋友都成功夾到公仔。以紅磡馬頭圍道舖頭為例，月租5萬幾元，購買20部夾公仔機需至少12萬、13萬元，連同三按一上，開業成本約40萬元，經營至今一年，現時該店每月有10萬元盈利。平均而言，夾公仔店回本周期約半年，「當市況差，回本周期愈長，依家可能要8、9個月。」

張弘（左）和利紹豪（右）和與4位朋友合資開設夾公仔店Take Me Out，去年上半年開了6間分店，全為於民生區，如紅磡、荃灣、元朗。

　　坊間夾公仔店開足24小時，內設兌幣機供客人換幣，毋須聘請員工即可營運，加上入場門檻低，吸引不少人投資，但兩人認為，要持久經營，只有靠與客人的互動方能贏得口碑，店內亦不時舉辦活動吸客，「以前試過做Roadshow，比客人免費夾公仔，夾到就攞走，拍檔亦會駐場教客人點夾公仔。」

　　免費教客夾公仔，豈不是變相減少收入？利紹豪談道，「我地唔介意教識人玩，因為玩夾公仔要有技術之餘，亦要有運氣的存在。7分技術，3分運氣。」除了教客人夾公仔，店內亦與網上夾公仔App「爪力全開」合作，由線下帶到線上，線上帶回線下，「我哋喺夾公仔機公仔放免費爪券（意即贈券），夾到公仔同時，亦可以免費在App玩。」兩者看似有競爭，但同時互補，「實體玩夾公仔同網上玩有區別，對方想合作，係因為嚟夾公仔嘅人，真係鍾意夾公仔，拎咗免費爪券，亦都會返屋企開App再夾，擴闊客源。」另一方面，合作方亦會在App和網上宣傳，實體店有免費爪券，不時亦有Promoter和Blogger到店做宣傳，帶旺實體店人流，「之前有Promoter嚟我哋舖頭教客人點玩，以及派禮物比佢哋。」

同行爭租旺區地舖

　　經營之初，他們和拍檔曾戲言要「每月開一間分店」，去年首半年的確做到，現時剛好有6間分店。自6月起，社會運動頻仍，即使他們店舖全為於民生區，生意同樣受影響，連帶經濟不景氣，市民消費意欲大減，與其他同行比較，他們放慢開分店的速度。「我哋資本細，好難擴張得咁誇張，但想做好每個細節，讓客人想攞多啲嘢走。」

　　市況差，有危亦有機，各區吉舖湧現，本應是他們擴張的好時機，兩人亦有意開分店，頻頻外出睇舖，目標是旺區地舖，可惜無功而回，「暫時未搵到適合舖面，加上競爭大。旺角我哋好想做，揀咗幾間舖，問過價錢，但最終傾唔成。後來發現，當有一啲最想做嘅舖，轉個頭就被人租咗去做夾公仔。」舉例說，兩人曾看中旺角新寶戲院附近地舖，面積約700至800平方呎，叫價11萬元，「我哋要傾到10萬元先租，但業主唔肯，最後聽中介講，好似15萬元租畀人，話係賣波鞋，點知又係夾公仔舖。」

　　兩人認為，正因經營夾公仔店門檻低，入行者眾，此時更要謹慎考慮和擴張。「揀舖最緊要人流旺，愈當街當巷，接觸人愈廣，機會愈大，但租金偏貴。因為香港街舖租金回落，引致咁多人都可以係大街開。」兩人亦笑指，正因市況差，小店才能到業主「討價還價」。

大人和小朋友都愛夾公仔。

　　講起夾公仔生意，兩人頭頭是道，就連申請牌照、維修夾公仔機等，所有工作均由團隊自己包辦，細問之下，才發現原來他們並非夾公仔發燒友，「我哋以前有夾過公仔，但身邊無人對夾公仔機有研究，亦未開過舖，我哋係見步行步，開咗第一間先算。」團隊共6人，全為80後和90後，當中不乏會計師、工程技術人員等，「我哋好著重團隊，有團隊做嘢先輕鬆。」亦因如此，他們一見到有機會，即放手去試。

元朗千色店設有雙層機，適合小朋友的身高，賣點是就連小朋友都可以輕鬆夾到公仔走。

新商場開茶記獲延長免租期

　　這邊廂，利紹豪和張弘在夾公仔店，談起夾公仔技巧、維修夾公仔機，另一邊廂，兩人走到地盤內，正裝潢未開張的茶餐廳。原來，他們團隊除了經營夾公仔店外，亦是茶餐廳東主。

　　下月開張的茶餐廳「港原味」，以舊香港做主題，餐廳牆身由俄羅斯畫家繪製舊香港的景色做招徠。餐廳賣fushion茶記菜式，主打健康元素，如推出有機車厘茄西炒飯，亦會重新包裝傳統中菜，如脆皮豆腐火腩飯等。茶記位於大角嘴利奧坊2期地舖，午市賣平民飯，晚市會主攻中、高檔客路。張弘分析道，「短期性茶記做地盤客，附近有3個盤，但都唔好睇小寫字樓客，附近有滙豐中心、酒吧街，我哋觀察過，夜晚做低檔路線未必做得好，反而做中高檔，人均消費300至500蚊人頭反而坐到六、七成。」