傳奇商人、友欄作家決定參選了，拋出一份可以用嚟選特首嘅政綱，宣布參選立法會直選。

　　兩年前，港視以網絡電視形式開台，頭炮開台劇係《選戰》，當時係以2022年特首選舉做藍本，講述幾個派系之間嘅鬥爭。兩年過後，呢位香港魔童決定自己做主角，以立法會選舉作為《選戰2》嘅故事背景，延續佢自己嘅傳奇，我唔會投佢一票，但我睇好佢台戲。

　　有人話估唔到佢參選，其實有跡可尋。真．開台夢碎，攞免費牌無期，電視台變身大商場，你話佢成功咗咩？又唔係，但係佢絕對冇失敗到。多年嚟，佢搞咗幾盤生意，電訊、寬頻、電視，每樣都成功帶起社會話題，帶起埋行內競爭，十幾萬人曾經為佢上街向政府（其實係向一男子）抗議，佢冇落場，但係為自己儲落政治籌碼同埋號召力。喺現今政壇，的確未有一個人有佢嘅魅力。

　　每個人都睇到佢份政綱係用嚟選特首，佢喺記者會上就不置可否。其實大家都係用一種睇戲嘅心態，想佢同六八九正面交鋒，我相信呢度已經會吸咗好多票。開頭佢出嚟選，聲言政綱重點只有三個字：「換特首。」睇落，係私怨想報仇，係對人不對事，係好膚淺，但係諗落，佢係講呢三個字最有力嘅人選，比起佢嘅前黨友田大少更加對題，因為佢自己就係一男子決定之下嘅受害人！「弱勢」加「往績」，佢呢一位男主角，合乎港式劇集嘅「成功人士遇挫敗、努力搵方法報仇」嘅方程式，所以佢呢個「選角」，係非常合適。 

　　佢政綱嘅細節，唔係我杯茶，理念完全唔同，更遑論投佢一票。但係而家香港呢台戲，似乎真係需要呢一種奮戰商人，因為佢睇到嘅，係點樣用最有效方法，去達成心入面嘅目標，同佢過往二十幾年一樣。佢亦都講明，打贏呢場仗，再加上佢所指嘅「反梁陣營」過半數議席，就會喺立法會向六八九提不信任動議，路線係清晰過好多其他政客。

　　當你見到同佢同區嘅前高官阿太議員，會同大家講，07年返嚟香港參選，係因為想拯救香港；當你見到樹根彈出彈入，鬱鬱不得志；當你見到六八九每日都被追問會唔會連任，因為大家都唔想佢連任，想快啲得到個好嘅答案鬆一口氣，我樂觀其成，因為建制內部瓦解，點都易過外部擊破。最後會唔會好似港劇方程式最後一步「主角打敗敵人，返屋企BBQ」呢？就要由佢自己爭取啦。

　　喺而家嘅香港，有一個值得尊重嘅對手，變成一件要好好珍惜嘅事，無論對任何派別都係，係悲哀，但同時代表，仲有啲希望。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【香港好去處】etnet全新頻道盛大推出！全港最齊盛事活動資訊盡在掌握！► 即睇