立法會選舉報時信號：距離投票日，還有4日。今日嘅天氣係：陰暗無光，寒風凜冽。

 

　　如果今次選舉係一齣電視劇，佢喺各方面都十分「精彩」，光怪陸離、主角配角都交足戲，為全港觀眾獻盡花生，近呢一個星期步入高潮，先有新界西候選人，自由黨嘅周永勤喺電視台直播論壇宣布棄選，而且會離開香港，原因係「唔想身邊人受更高層次嘅壓力」，被記者追訪背後因由時更爆喊高呼「我唔想講呀！」當日較早時間，就有一篇雜誌報道，指有人向周永勤開出條件，一係要錢一係要官位，要求佢退選，矛頭直指另一位候選人、被稱為新「中聯辦契仔」嘅何君堯。呢幕睇到人咬牙切齒、怵目驚心。多個政黨到廉署舉報事件，有人為咗幫黨友討回公道，有人就希望還中聯辦清白，悉隨尊便，總之廉署決定立案調查，就睇吓他日查到啲咩出嚟。

 

　　空穴又突然吹起猛風。被視為係中資背景、去年經歷垂死掙扎嘅《成報》，繼年頭喺梁頌昕行李事件大鬧梁振英之後，噚日頭版刊出署名「漢江泄」嘅評論文章，大字標題「煽風點火港獨鬧劇 梁振英播『播』獨」。點都估唔到，「確認」梁振英係「港獨之父」地位嘅，會係成報。

 

　　文章開宗名義，炮轟梁振英利用一個混亂嘅局勢，為自己增添連任本錢，又指控中聯辦喺香港變成「中管辦」，儼然喺香港設立咗一個「小中央政府」。最後全文總結就係要求大陸中紀委盡快完成針對中聯辦嘅調查，還香港一個「寧靜健康」嘅環境。

 

　　如果遮住個報頭，大家真係會以為係蘋果日報等系列嘅報紙，但竟然係成報，突然間良心發現講真話？自然引起各方猜測，多數都係兩種結論，第一就係佢係成為大陸權鬥嘅工具，一派鬥一派；第二就係成報主席谷卓恒等人告御狀。翻查紀錄，《成報》經歷早年嘅一輪賣盤後，目前係中國商人谷卓恒擁有。舊年年中，《成報》曾經有段時間瀕臨結業，停刊近一個月，後來谷卓恒用自己嘅方法，外界冇人知嘅方法，又撐得住。

 

　　谷卓恒係神秘嘅大陸商人，同以前亞視大限前出現嘅情況類似。觀乎佢嘅神秘背景，未搵到同大陸政府嘅聯繫喺邊，告御狀嘅機會比較大，亦即係好有可能係谷氏等人公器私用。但有趣嘅係，噚日選管會亦都宣佈，有三間機構獲准喺9月4日選舉日喺票站外做民調，包括港大民意研究計劃、香港研究協會、以及意想不到嘅名字「成報」，根據資料，係回歸後首次有傳媒機構獲准做場外民調。

 

　　成報嘅文章，定位係以「愛國愛港」作為基礎，要求中央將梁振英張曉明等「亂港份子」收拾，絕對就唔係用泛民甚至本土角度，而係挨近建制派內反梁嘅路線。佢而家成為場外民調一員，可以話係帶住獨有立場去收集資料，背後玩緊啲咩呢？

 

　　我搵唔到答案。以香港人作為本位，呢件事可以揀食花生，但我更為之擔憂，一種香港人不熟悉的權鬥模式，喺今次立法會選舉上演，用各種各樣嘅姿態、傳媒報道展現喺大家眼前，嗰種醜惡，越演越烈，吾不欲觀之。尤其見到政府越嚟越多小動作，更加冇眼睇。

 

　　只係想大家喺四日後，無論你係泛民、本土、熱狗、中間、建制、保皇、定係五毛打手，最緊要從心出發，投下自己真誠相信嘅一票，因為，我唔知道香港人仲有幾多次機會可以由心而發去投下神聖一票。

 

　　即使空穴再吹更猛烈的風，仍然希望大家頂住呢場風暴，認真投票，昅實呢場選舉。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》：講講常見年輕人理財問題！想「人有我有」？認可理財社工分享理財觀念小秘訣！► 即睇