聖誕節臨近，大家諗好去邊玩未呢？日韓台肯定係首選，有冇人會揀大陸呢？十年前可能仲會有，但係去到冇乜聖誕氣氛，畢竟當地都唔慶祝呢個節，而家？除咗述職同探老公同個仔之外，都應該冇乜人會去啦。

 

　　而代入鄰近地區嘅心態，天朝大國行無神論，耶穌生日關我啥事？我們天天就在拆那些教徒的十字架，主教任命過得了你們所謂的天主一關，也要先看看過不過得了我們共黨那一關，不滿意唄？那就搬走啊！中國不會慶祝這些西方玩意。沒有聖誕假，中國人最愛就是學習模仿外國標準，來個有中國特色的節日，近幾年為咗同外國嘅白雪奇境搶客，中國特產白霧奇緣，以習大大嘅「中國夢」做包裝，每年嘅冬季，整個華北就成為夢鄉，你一踏入華北大地，就會步進夢境，眼前白濛濛一片，係清醒？定係發夢？咦，聞落仲有啲燶味喎。欵，你在發夢，一切都是幻覺。

 

　　一年一度嘅霧霾節，已經成為國家大事。不妨睇吓鄰近地區嘅人係點樣投入節日氣氛。咁講到節日，學生放假就少不免啦，我哋聖誕都有假放。但放假都係要上堂嘅，有老師就選擇喺課室開著手機做Live，有人更因而成為網紅。另外陝西有學校要求學生喺霧霾之下露天考設試場考試，感受濛瀧中答試卷嘅滋味。

 

　　好少遇上霧霾嘅成都政府就覺得應該共享做中國人嘅光榮，要脫開面紗，迎接外賓，點能夠帶住口罩示人呢？正所謂「有毒氣體無害」，成都府喺吞雲吐霧方面的確係領先全國啊！我建議下一輪霧霾時，成都市領導應該拍片直播，教大家點樣品嚐國產霾，肯定紅過上面講嗰位老師！

 

　　中國人不嬲都好識做生意，霧霾節呢啲機會，又點可以錯過？直程係一個產業嘅興起，聖誕節諗禮物諗到抓晒頭，霧霾節就唔同啦，簡單得多。手機要有「尿袋」，即係流動充電器，強國人就要有流動氣袋，以至一罐罐細心包裝嘅氧氣，剩係送呢樣都夠皮啦。

 

　　今年，全國有5億人民可以「享受」霧霾節嘅「喜樂」，由過去只係華北，擴散到長江以北大範圍都淪陷於霧霾之中。學校停課、醫院逼爆、航班延誤、公路封停，但唯獨工廠繼續天天運轉，當然呢！拼經濟怎能停！

 

　　中國係有人反抗嘅，有維權律師入稟控告政府防治霧霾不力，要求政府道歉並賠償，但消息被和諧，某幾份大報報道過後，好快就被「河蟹」了。成都人戴口罩到市中心示威，要求政府治霧，但就被拘捕。一般人呢？我只能夠講，中國人嘅適應力真係太強。

 

　　我哋咁多年嚟，喺電影中想像嘅敵托邦（Dystopia）已經出現了，污染惡果、Big Brother is Watching You、媒體歌功頌德，明明係好有問題，當你提出問題，卻被當成有問題的人，被解決掉，仿似問題就不存在了。其他過往咁多問題，例如人權自由民主呢啲冇咗，啲人真係feel唔到嘅，係要等自己出事先知瀨嘢。霧霾唔同，見到、聞到、每下鼻息都感受到。即使只是每年冬天出現「一會」，但所謂最強，沒有最強，只有更強，因為大陸所謂治霾，全部都係治標不治本，班官員始終要為經濟數據不停拼湊，工廠所謂減排，是否足夠？治霾有落地實行嗎？成效去了哪兒？今個星期初，大陸幾份大報，連政府發出紅警後，「排放降了三成」也可以大造文章一番，唔知重以為永久滅霾。你以為已經自欺欺人？

 

　　北京市府早前計劃，將霧霾列做氣象災害，世界上有咩比呢樣嘢更加自欺欺人？呵呵，人禍都算上自然災害那一筆了，治污染變成治災害，咁樣真係會對症下藥？

 

　　中國人啊，你為何不生氣？除了生產氧氣之外，你無事可做了嗎？這兩年的情況告訴大家，快將回不了頭，霾伏愈來愈深，愈來愈密，空氣污染最直接影響，是你和我的健康，但政府嘅治霾卻係停留喺門面工夫：搞警示系統、改列霧霾分類、數據減排。為何不走多一步，向政府問責？抑或，在放任的發展和寶貴的生命之間，你們選擇了前者？

 

　　可能在幾十年後，華北就會成為寸草不生之地，最重要的是，人民的肺都已經被污染物囤積滿滿，下一代健康將出現各種問題，你這一刻習慣了，到時候誰來埋單？

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇