「冇驚喜即係冇驚嚇」，係林鄭喺上任前用嚟形容佢嘅「新」班子嘅金句。事實證明，原來，啲驚喜驚嚇係留返喺副局政助嘅任命呢度。

 

　　政府公布咗第一批副局政助名單，一共委任10名副局及8名政治助理，林鄭政府今屆就識玩啦，做足吹風工作，由6月開始已經一直放出多個Testing Ballon，向多個傳媒發放「消息」，透露潛在嘅副局政助人選，真真假假，令人睇到撲朔迷離，讓子彈飛咗成個月，等成個社會支持定反對聲音都塵埃落定嘅時候，就正式公布人選，喺呢方面，林鄭政府嘅公關手腕絕對比上屆689治下勝一籌。不過，暫時未見可成驚喜嘅傳媒人吳璟儁及蘇敬恆，據報道指兩人仍待品格審查，要等多一陣。

 

　　雖然係咁，首批副局政助名單係會令保皇黨感到欣慰嘅，因為有4名人士都曾經喺選舉遭遇滑鐵盧，但係選輸咗唔緊要，「你有黨啊！」噢不不不，「你有林鄭娘娘啊！」。敗部復活嘅4人分別係2015年落選灣仔區議會選舉嘅創科局政助張曼莉、出身自由黨，2013年落選京士柏區議會選舉嘅運房局政助符傳富、同樣出身自由黨，去年落選立法會商界功能組別嘅財庫局政助陳浩濂、以及最大名鼎鼎，未上任先令教育界風起雲湧，出身教聯會，去年落選立法會教育界功能組別嘅教育局副局長蔡若蓮。

 

　　林鄭唔單只喺公關手腕上贏689，喺做回收桶，活用「人才」方面更勝過689至少三條街 。事隔接近五年，大家仍然記憶猶新。民建聯嘅劉江華以一介垃圾桶窺看世界嘅造型，成功搏得網民連番訕笑，但可能垃圾桶形象太深入民心，搏得笑聲，卻搏唔到選票，喺2012年9月立法會選舉落敗於超級區議會界別。當時689政府已經上任兩個月，見佢咁可憐，689伸出友誼之手，喺12月委任劉江華做政制及內地事務局副局長，其後更加喺2015年嘅換人風波當中坐正民政局， 正式開展港式「輸選舉升官發財」之路，真係一時佳話。

 

　　今屆林鄭舉一反三，一次過招攬4名選舉敗將走入政府 ，全面開托政治回收行業。邊個保皇派選輸選舉，就可能係另一條康莊大道啦。 

 

　　有人話，敗部復活係等閒事，反對派大驚小怪。無錯！外國例子排住隊咁畀你數添，2008年美國總統選舉，民主黨黨內初選奧巴馬鬥希拉莉，最終希拉莉屢戰屢敗，奧巴馬脫穎而出，佢當選總統後，委任返希拉莉做國務卿，以示民主黨黨內團結。講近啲嘅就有台灣，蔡英文去年當選總統後，委任手下敗將、親民黨主席宋楚瑜出任總統府資政，為總統下建言等等，雖然係無薪公職，但呢個位置都有一定份量，舊年年底宋楚瑜就代表台灣到秘魯利馬出席APEC峰會。 資料亦顯示，1992年，時任保守黨主席嘅彭定康協助保守黨嬴得大選，但佢自己卻喺下議院選舉中落敗，因此，佢嘅戰友、時任首相馬卓安就決定委派彭定康來港，成為末代港督。 

 

　　其實既然咁鍾意敗部復活做公職，參考返以上案例，林鄭不妨委任曾俊華或者胡國興一官半職，或者入行會，咁樣可能更加搏得更多掌聲，更加團結建制派添。使乜好似而家咁，畀人笑？林鄭對於民主派嘅批評，可能都係以佢最近嘅口頭襌「唔明白」、「好難理解」去回應，但真係咁難明白？ 

 

　　張曼莉、符傳富選輸區議會，都仍然可以話佢哋係政治歷練少，欠缺知名度，未必真係關能力事。而陳浩濂選輸商界，但商界係小圈子，公司票、老闆票為主，可能欠缺參考性，還掂佢哋都係閂埋門決定畀邊個做架啦。 

  

　　點解委任蔡若蓮會被視為向教育界開戰，全因教育界係最多登記選民嘅傳統功能組別，算係最「民主」嘅一個界別，「民意」非常清晰，蔡若蓮係不獲教育界選民認可，你委任其他建制派，或者公務員大家都冇咁嬲。去年選舉對於教育界選民而言，就係「教協 VS 教聯」嘅對決，最後蔡若蓮只取得不足三成票數，喺12月嘅選委會選舉，蔡若蓮領軍嘅團隊落敗，得票率更低，只有23%。林鄭好難怪大家會覺得，蔡若蓮做副局，不合理程度比起「垃圾桶升城煌」更高。 

 

　　而家嘅香港，政治夠忠誠就可以扭轉輸贏，前路一片光明。選贏嘅就要面臨政治係咪忠誠嘅測試，唔夠忠誠就DQ。「成寇敗王」之局，已經形成。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇