聞名不如見一面

　　巴西其實真係好大o架，鄉下仔！我講我自己啫！對巴西嘅傳統印象響聖保羅一啲都唔啱使，冇陽光冇沙灘，冇森巴冇氣氛，第一感覺真係麻麻地，唔通以前嘅印象全部都係假嘅？

 

 球迷阿聰（左），見佢嘅chok樣就知來自香港！

 

　　瞓咗一晚，第二朝落街行下，先發現原來我嘅酒店位處於聖保羅嘅商業區，平日晨咁早就已經有一班又一班嘅白領朋友返工，腳步速度拍得住中環一族。

 

　　記憶中嘅陽光與海灘，其實只屬里約熱內盧等沿岸地區專享，但又唔知係唔係冇咁多靚景，就唔使掛住玩，聖保羅嘅人呢原來出咗名係工作狂喎，所以暫時見到遊客仲興奮過本地人嘞。

 

　　遊客球迷當中，有唔少克羅地亞粉絲，其實佢哋隊波實在唔錯，加上巴西家陣面對社會咁大嘅壓力，克羅地亞輕鬆上陣之下，分分鐘有好表現喎，所以佢哋班球迷飛過嚟隨時唔止睇三場分組賽㗎。另外又有一個超級巴西迷，由86年開始每屆都會揸自己架私伙車去朝聖，今屆終於揸到返「家鄉」嘞。

 

　　香港球迷暫時唔多見，剩係遇到一個，不過呢位阿聰又好有趣喎，佢一個人孭個背囊就起行，話夠自由兼可以識下新朋友。

 

　　至於安全方面，我亦身先士卒試下單人匹馬落街狂跑咗廿分鐘，結果除咗流一身汗之外，無咩損失，偶爾遇到一啲流浪漢哥哥，亦可能因為我風馳電掣咁路過，佢哋最多都只係行個注目禮，冇咩行動可以做囉！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票