《Online有話兒》耶倫猛吹風加息，仲話對美國而言係好事？

　　話說美國呢期吹風，好似為加息鋪路，而財長耶倫仲話提高利率對美聯儲而言係一件好事。究竟點解耶倫覺得加息有用？而加息對目前經濟又有咩利弊呢？

 

（AFP圖片）

 

耶倫：如果加息可以緩解到問題，係一件好事

 

 

（Shutterstock圖片）

 

　　耶倫係昨日（６日）接受採訪時就表示，對於外界覺得美國總統拜登嘅四萬億美元支出計劃會引起通脹，佢就認為兩者本身無太大關係，仲話呢十年美國一直同通脹過低作戰緊，所以希望可以令到利率環境返去正常水平：

 

　　「如果最終利率水平可以略為提升，對緩解問題有些許幫助，從社會及美聯儲角度來說，實際上係一件好事。」

 

　　雖然聯儲局經常重申2%通脹目標，而係取得「實際性進展」之前都唔會縮減買債規模；盡管近期債券收益率持續偏低，有分析憂慮如果聯儲開始減少買債，有機會觸發債券嘅恐慌性拋售，重新推高債息對美國貨幣市場有害無益；而耶倫話今年通脹有機會達3%，不過強調只係「暫時性」，叫大家唔使太擔心。

 

疫情未好，立即加息有著數？

 

 

（Shutterstock圖片）

 

　　雖然耶倫猛吹風為加息鋪路，不過有分析認為，美國接種疫苗數雖已過3億，但疫情又未完全熄滅，而家加息對美國乃至全球經濟可否承受仍然未知之數；大摩經濟師Chetan Ahya認為，如果明年第二季美國通脹升超過2.5%的話，屆時美國有機會提早「收水」令美元走強，對新興市場有負面影響之餘，成熟市場嘅資產價格也會十分波動。

 

　　至於加息唔加息，市場目前反應不一，唔少大行認為聯儲局最快明年或2023年就會開始加息，以應對通脹環境及穩定物價；不過，美股而家係歷史高位水平，早幾日道指先突破35000點關口，究竟美股可唔可頂得順收水之後有機會出現嘅熊市呢？呢個亦都係投資者十分憂慮嘅情況。

 

耶倫同劉鶴視訊會議，中美重回正軌仍有漫漫長路

 

 

（Shutterstock圖片）

 

　　加唔加息都應該至少係下年嘅事，而同中國修補關係不確定性就更大。係上個禮拜耶倫就同中國副總理劉鶴進行首次嘅視訊會議，當中討論拜登嘅財政計劃以及雙方係符合美國利益嘅領域下進行合作嘅重要性，並期待未來繼續同劉鶴進行會談；副總理劉鶴就話雙方經濟關係十分重要，呼籲本著平等及相互尊重態度，進行多邊和雙邊合作交流。

 

　　雖然拜登政府有意同中國修補關係，好似早前小米（01810）已經解禁咗，不過雙方分歧仍然好大，加上目前中美談判好多時候仍涉及「人權」問題，而中國反覆強調台灣疆藏議題是「必須堅守的紅綠」，睇嚟雙方關係重回正軌，仍有漫漫長路。

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好