《Online有話兒》德國水災造成百人死亡，默克爾卸任前最大考驗？

　　據外地媒體指，德國西部連日水災引發山洪災害，截至18日為止已經造成157人死亡，670人受傷；而德國總理默克爾係昨日（18日）前往災區視察，並承諾給予最大援助。有媒體分析表示，係疫情及災害雙重夾擊下，9月即將離任嘅默克爾可能遇上生涯上嘅最大挑戰。

 

 

（Shutterstock圖片）

 

歐洲災難幕後黑手－氣候變化

 

 

（Shutterstock圖片）

 

　　其實好多媒體都表示，呢次水災其實好耐之前已經被科學家警告過，因為人為性氣候變化，將會令到歐洲降雨及熱浪將變得更強烈，不過呢類警告從來未被重視過，所以防範措施都做唔夠。

 

　　除左德國之外，目前英國都面對緊洪水及降雨威脅；而荷蘭雖然未有死亡報告，不過河岸數以千計嘅小鎮都被警告希望儘快搬離家園；瑞士首都伯爾尼都錄得河流決堤個案，並以每秒560立方米嘅水量氾濫破晒紀錄。不過，德國依然係受害最嚴重嘅國家，主要城鎮嘅街道、橋都被摧毀，1300人下落不明，同打完仗無分別。

 

默克爾迎來生涯最大挑戰

 

 

 

（Shutterstock圖片）

 

　　據了解，呢次德國合共派出1.5萬名警察、士兵、及緊急服務人員幫手搜救，而德國總理默克爾係周日（18日）前往萊茵蘭–普法茲州視察災情，連默克爾自己本身都形容災情十分可怕，目前搜救困難嘅地方係洪水水位仍然好高，所以救援人員都難以進入地區搜救；而部分地區一直信號中斷，有數以百計市民失蹤。另外，德國西部一座大壩有倒塌風險，下游4500名居民都需要立即撤離。

 

　　點解話呢次暴雨係默克爾生涯最大挑戰呢？因為當洪水撤退後，假如處理不當的話就好容易惹來瘟疫，加上目前新冠病毒係歐洲依然肆虐，假如處理不當的話將會形成新一浪傳播；而災後重建工作、安置市民、清理垃圾等，背後涉及數以十億計嘅金錢支出，都需要嚴謹計劃先可以成事。

 

另外一場政治show的開始

 

 

（Shutterstock圖片）

 

　　另一方面，德國9月將會開始選舉，所以呢次災情都成為候選人嘅「政治Show」。不過，被外界視為「默克爾接班人」嘅德國基民主席拉舍特前往視察災情之際，因為同身後周為嘅人吹水，期間仲大笑起來，呢個舉動被媒體Cap低之後大事宣揚，好似《星期日圖片報》大字標題就話：「全國都在哭泣，拉舍特卻在笑。」

 

　　與此同時，經歷呢次災情之後，唔少候選人都開始就「氣候變化」發表意見，試圖爭取選民支持，不過呢個題目從來都係政治界嘅「雙面刃」，好似綠黨一名議員想藉呢次災害批評對手政黨，不過市民就覺得呢位議員係借題發揮兼抽水表示反感。喂，阿哥，人命嚟㗎！救左人先再慢慢抽水啦！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇