2019-06-13
【奇葩HR】未正式出Offer就叫人先辭職？小薯偽轉工奇遇實錄（上）
前兩個星期同大家分享過我嘅私人資料外泄，係head hunt、唔同行業間不停流傳，但機遇巧合下反而得到一間跨國公司打電話嚟interview。有讀者好奇，問我究竟有冇轉到工。答案係：冇！因為世界那麼大，奇葩避唔哂。呢間公司嘅奇葩HR嘅處事手法，我真係第一次見，所以就算OFFER有幾好、公司個名有幾響，我都係選擇留返係現公司慢慢踏上海鮮之路過好。
當日收到來自西班牙總部嘅電話，初步進行左phone in之後，我受邀去左香港分區office進行第二輪面對面嘅interview。面試過程千篇一律，都係叫你介紹下自己、講下點解想入佢地公司、比1-2個scenario你解難等等⋯In得好唔好就見仁見智，因為好多時你覺得自己in得好，有信心有下文，結果你個application可能石沉大海；相反，有時你覺得冇咩希望嘅interview，反而意外得到好消息。所以，反正仍在職嘅我唔係「必需」得到呢個offer，interview過後一星期我都當左面試失敗。事隔一個月後，呢間已被遺忘嘅公司突然有消息，仲話畀offer我添！
收到surprise電話，仲唔turn on bargaining mode同對方為package抗爭咩？點知HR嘅口中嘅offer意外地令人滿意，人工畀足expected salary冇壓價、年假多、公司benefit都比現公司好，直頭係你要求嘅所有野佢都滿足你。不過，事情如果發展得咁順利，我一早轉左工喇。正所謂「阿婆走得快，一定有古怪」，咁順攤，皆因有要求。
「因為team head好急要人，你可唔可以今星期內遞信？」
「可以，如果我星期五前收到official offer而又confirm得到，我星期五遞。」
「咁我盡量星期五做好份proposal比你。」
一心諗住有offer在手嘅我做野都開始懶懶閒。如是者，懶左幾日直到星期五，仍未收到任何offer。正糾結打唔打電話問對方HR 之制，佢打黎了！
「hello玄小姐，你上次話左今日遞信喎，係咪可以30日後onboard呢？」
吓？我話有offer就遞信啫？乜都冇你叫我點遞啊？
「係呀，如果今日收到offer又confirm 到，我可以今日遞啊！」
「哦，啫係未遞嘅。因為整proposal都需要時間，你會唔會選擇相信我地，今日遞左先，我再後補offer比你？」
「唔…我諗我都係想等埋個proposal先，唔好意思。」
「好喇，我下星期初會畀你喇。」
相信你遞信先？我同你好熟啊？呢個世界唔簽contract約束對方，真係講個信字啊？我相信你辭職先，到時個offer點出我都冇say喇，用個腦都知冇可能喇，你唔好恃住自己大公司就壓榨我喎！事情仲未完結，下星期奇葩二號出現，再同大家分享！
《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。
【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票
