全城競猜誰「摘瓜」 拆解誠哥廣告玄妙之處

　　薑幾時都係老嘅辣！「香港首富」李嘉誠（誠哥）嘅說話幾有份量，唔使Jenny多講。面對而家個社會環境，誠哥即使退咗休，依然非常上心，今日就一於喺多份報章賣頭版廣告，發表下意見。一句「黃台之瓜，何堪再摘」可謂高章到極，唔講到明，全城即刻競猜誰是「摘瓜人」！

 

 

 

誠哥忍唔住要出聲喇！

 

　　話說今朝Jenny起身睇報紙嗰時，見到有人以「一個香港市民李嘉誠」嘅名義，喺全港多份報章刊登兩款全版廣告，其中一款廣告內容係：「正如我之前講過：『黃台之瓜，何堪再摘』」，另一款廣告就以反暴力為主題，大大個禁止符號喺暴力兩個字上面，頂頭就寫住：「最好的因，可成最壞的果」，兩邊分別係「愛中國、愛香港、愛自己」同「愛自由、愛包容、愛法治」，底部就寫「以愛之義，止息怒憤」。Jenny當堂嚇一嚇！誠哥「開腔」喎！唔係講笑啊！

 

　　大家都知假新聞橫行，呢個「李嘉誠」係咪真係誠哥先？Jenny同埋同事即時去Fact Check，誠哥就透過發言人認咗係佢呀！今日用「一個香港市民」身份登廣告，主要係因為佢認為，香港長期繁榮穩定繫於「一國兩制」行穩致遠，叫大家一定要以愛之義，止息怒憤，對「一國兩制」，以謙和而珍之。

 

兩款廣告 八字真言玄又玄

 

　　咁誠哥做咩要登兩款廣告呢？發言人就傳話比Jenny聽，咁係因為目前香港形勢複雜，難以用單一語言或者溝通方法回應，形容「應以何身得度者，即現何身而為之說法」。誠哥仲呼籲唔好「讓今天的激情，成為明天的遺憾。」大家Get唔Get到？

 

　　Jenny只能感嘆一句：「高人真係高人！」，大家成朝早就一直討論當中「黃台之瓜，何堪再摘」究竟背後有咩意思？

 

　　呢八個字出處係《新唐書．承天皇帝倓傳》「（李）賢終日憂惕，每侍上，不敢有言，乃作樂章，使工歌之。其言曰：『種瓜黃台下，瓜熟子離離。一摘使瓜好，再摘令瓜稀，三摘猶云可，四摘抱蔓歸。』」李賢就係武則天同唐高宗個仔，佢呢首絕命詩，係用瓜作比喻，想勸阿媽武則天，唔好再對自己仔女趕盡殺絕。而家誠哥究竟想勸邊個？中央？政府？香港人？示威者？真係人人唔同解讀！

 

驚見「藏尾詩」？定大家諗多咗

 

　　Jenny反而最留意「正如我之前講過」呢幾個字，即係誠哥覺得有人唔聽佢老人言，結果吃虧在眼前？因為誠哥2016年講起旺角騷亂嗰時，都吐出呢八個字，話從事政治的人物，都要研究和檢討呢一課（旺角騷亂），了解出現嘅原因，仲話「香港唔可以再有唔同政見的派別都來傷害香港」

 

　　至於另一款廣告，看似無咩特別，但就有網民發現係「藏尾詩」，每句最後一個字加埋竟然併到「因果由國，容港治己」八個字，不得了！究竟係誠哥有心為之，定係網民諗多咗？其實，Jenny 就覺得後者居多，不過大家都知誠哥修為之高唔係普通人Level，所以點解讀似乎都有無限想像空間呢！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票