釋法落幕，梁游已經被DQ（取消資格），伴隨住嘅結果，就係有一連串嘅司法覆核喺法院排緊隊上庭。而好多學者都分析過，劉小麗同姚松炎應該係下一波DQ大熱，其餘只係喺宣誓時有加鹽加醋嘅，被DQ與否都係五五波。不過Tina收到風，話「DQ」唔單止係反對派，仲有一位重量級建制議員。

　　呢位重量級議員大家唔好以為係黃定光，傳聞係大主席梁君彥。當然，以梁君彥嘅地位，唔會因為忽略宣誓而被DQ，但佢上任之後一連串嘅舉動就惹嚟好多建制派不滿，而呢種不滿已經係溢於言表。最大嘅問題，係佢無一早猜透阿爺嘅心意，容許梁游兩人再次宣誓，最終更要動用到人大去釋法。佢一個人嘅一個「決定」所牽連對社會嘅影響，已經令到阿爺要重新審視呢個「人才」。

　　建制派之間近日一直流傳，話梁君彥可能做唔足四年大主席，可能會喺宣誓風波完結之後，或者最遲被DQ議席補選過後就會呈辭。不過Tina聽到呢個說法都有D質疑，最主要係梁君彥已經做緊大主席，有心辭主席位置的話，必然係連立法會議席都辭埋，無理由坐返落去睇其他人做大主席，咁肯定係不是味兒。其次，過去從未試過有大主席做做下唔做要重選，唔通佢又甘願搞多次「大龍鳳」？

　　政圈中人分析，經過今次釋法事件，阿爺都知道對香港有深遠影響，再加上選舉委員會、特首選舉在即，要再郁動「三權分立」其中一權嘅老大，似乎會進一步影響香港嘅政治穩定性。所以，傳聞難以作準。不過，呢位政圈中人話，較難估計嘅係梁君彥經過今次事件之後，係咪已經覺得意興闌珊；如果佢自己去意已決，其他建制派又樂見佢離開的話，梁君彥自己DQ自己又未必係空談。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情