特首選舉隨著林鄭月娥辭埋職，可以話進入白熱化階段，依家只係等阿爺批埋「雙司」辭職（再次重申，Tina堅信阿爺係會一次過批晒雙司辭職），四隻馬就真係準備好晒落場跑。

　　要落場跑，第一個條件一定係入到閘先，要入閘就要「眾籌」，唔係曾俊華諗住同市民籌錢競選嘅隻眾籌，而係向「眾」選委「籌」佢哋手上一張提名票。四人之中，毫無疑問，林鄭喺西環體系大力推擁之下，估計可以奪得最多嘅選委票，有傳聞就話西環力保佢有超過600票以上。上星期Tina已經講，西環係全方位要求各界別選委唔好畀票曾俊華，聽聞近期更加公開，指林鄭先係「真命天女」，要求親西環嘅選委只可以畀提名票林鄭。Tina估計，按照現時嘅情況，林鄭得票應該坐5（500票）望6（600票），如果有6的話，禮賓府寶座更加可以話係「坐定粒六」。

　　第二穩陣入到閘嘅唔係曾俊華，反而係胡官胡國興。胡官超然嘅地位，令佢對於吸納泛民提名票毫無壓力，而本身反對小圈子嘅選委，畀票胡官亦係政治上最無風險嘅選擇，所以要喺手握超過300票嘅非建制派拎到150票，應該係好穩陣。

　　曾俊華嘅形勢就最複雜。之前Tina都講過，佢拎夠票唔難，難在佢絕不能靠過多嘅非建制票去入閘。但觀乎近周西環動作頻頻，落力為林鄭箍實提名票，「薯片」最多只可以向部分堅定支持佢?商界埋手，再加埋部分反梁振英2.0嘅非建制提名票入閘。不過唔少分析都相信，曾要入閘都係穩陣。

　　至於林鄭嘅師姐葉劉淑儀，真係四個人之中，最最最危險入唔到閘嘅一個。佢嘅票源同林鄭嚴重重疊，Tina甚至壞疑，佢自己黨入面嘅選委票，亦未必會全部畀晒佢。既然佢嘅票源同林鄭撞晒，選委好自然就會西瓜靠大邊，再加上葉太本身無可能拎到泛民提名票，要拎夠150張飛就真係有難度。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好