作為一個計時炸彈，第一個緊張位當然係按下計時器、見到時間開始倒數嘅一刻。而《逃犯條例》亦喺昨日(3日)正式按下「計時器」，喺立法會進行首二讀，跟住就會交畀法案委員會審議法例，過晒之後就上返立法會恢復二讀同三讀，計計數7月休會前可以搞掂。

　　喺未按制之前，富商「大劉」劉鑾雄將戲劇成分推至頂峰，入稟司法覆核希望阻止《逃犯條例》成功立法，等佢可以安坐大宅唔使驚畀馬交政府引渡佢返過去。一般來講，呢啲入稟嘅角色應該係由反對派擔當，但今次由大劉越俎代庖，為建制派商界議員帶嚟唔少震動，坊間更有人估計，最終會有建制派商界議員「跳船」否決修訂《逃犯條例》。

　　之但係，據聞喺大劉入稟消息曝光後，建制派團體陸續收到「指示」，要佢地堅定不移繼續無條件支持《逃犯條例》。不過同時間另外吩咐大家，考慮到今次修訂嘅反抗真係超出咗所有人嘅預算，為免講多錯多同影響之後嘅選舉工程，最好就唔好再立亂講自己意見，只要緊跟政府立場同講法就已經足夠。有建制派就認為，事件本來只不過係特區政府嘅內部事務，但係經過連日發酵，早已經提升至國際層次，更嚴重嘅係，商界嘅訴求凸顯咗港人對內地司法制度嘅不信任，間接影響埋其他地方對祖國嘅睇法，所以今次修例已經要出動到極高層次內地官員去全權處理。建制派可以做嘅都唔多，真係小講大幫忙。

　　今次修例其實真係搞出一個大頭佛，消息就強調，阿爺本身喺成件事之上都係零角色，只係特區政府自己處理嘅事務，但由於所有人都低估咗輿論意見，特別係商界高調「反檯」大大影響咗市民對阿爺嘅觀感，逼到阿爺要介入事件。聽聞今次有高級別官員令到阿爺唔多滿意，被批評政治敏感度不足，至於係邊位，消息就唔肯講，不過大家都估到呱？

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

想要獨家投資理財Tips？即Like etnet 全新Facebook專頁► 立即讚好