新一屆選舉委員會界別分組選舉噚日（19日）正式結束，需要競逐嘅13個界別分組產生364個席位，新制度之下嘅選舉果然有新氣象，只係區區4000幾票，夠膽死點咗成晚到今朝（20日）先有齊結果。難怪有選委都話要「完善埋個點票制度」。

（政府新聞網）

　　今次選舉大部分席位都唔使爭，早就被輿論評為「小圈子選舉」。係唔係小圈子選舉，唔係邊個講咗就算數，不過Tina真心覺得民建聯主席李慧琼講得非常「到位」。佢今日見記者時就被批評為「小圈子選舉」指出，「改制嘅選舉與過往有所不同，最重要係落實愛國者治港，兩者不能相提並論」。李主席呢個講法，無正面回應係唔係小圈子，但其實佢講得非常準確，因為今次選舉大前提係落實愛國者治港，咁要達到呢個目的，自然就唔可以畀非愛國者有機可乘，咁任何西方形式民主選舉，都難以達到呢個目標。唯一可以做就係用「港式民主選舉」，所以同過往嘅選舉好唔同，李主席絕對係一語中的。

　　至於係唔係「小圈子」，每位香港市民心都必然有自己嘅想法，普通市民一票都無得投，甚至唔知自己屬於邊個界別又唔知邊個代表緊自己嘅，自然覺得係「小圈子」；而站在當權者立場，依家有4000幾人投票去決定364個選委議席，又點稱得上係「小圈子」呢？

　　不過有建制派認為，最代表到唔係「小圈子選舉」嘅，應該係前民主黨成員狄志遠成功入閘。今次選委會選舉，狄可以話係代表人物，一般輿論都認為，狄就係「新一代反對派」嘅標準，所以Tina私底下同唔少建制陣營嘅人溝通時候，好多人都認為狄作為象徵之一，今次選委會選舉應該可以輕鬆入閘。

　　點知狄出戰嘅社福界戰情激烈，最終搞到最後兩席有三人相同票數，要靠抽簽先由狄「好彩」贏到。贏得驚險，有建制派認為證明幕後並無操盤手，否則就應該係Easy Win，不過如果幕後覺得佢贏唔贏都無乜所謂的話，呢個講法都難以成立。

　　係唔係「小圈子選舉」都好，新制度之下嘅選委會已經誕生，之後呢1400幾人，將會有三個任務要完成，包括年底選出40個代表選委會嘅立法會議席、要提名立法會候選人以及明年選出新一任特首。個圈係大好，係細都好，做小蟻民嘅只可以希望呢班人圈返一啲有返咁上下智慧嘅「治港人才」，否則全港都要攬住個圈圈（水泡）生活。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票