【醫生的話】高效防疫，有效搞笑

　　上周政府加辣，醫生對防疫措施最敏感，有些杏林高手對此更作富幽默感的回應：

 

運動型醫生：美食的渴求

 

　　有位每逢放假即上山下水的醫生，周末被困家中，仍不忘健身，並傳來有型踩單車視頻。跟著通電話：

 

　　「家中方七日……」他說。

 

　　「真係悶死人。係咪？」我接口為他完成感嘆。

 

　　「唔係呀！我想話：家中方七日，救助千萬人。請市民盡量留在家中，無必要，不出門。」

 

　　「係囉！不吸毒、亦不播毒。咦！睇返個視頻，原來喺件醫生袍下都啲有肌肉噃。」

 

　　「嘻嘻，田雞腿。」

 

　　「唔係呀，比例OK喎。」

 

　　「I am just thinking aloud。我考慮緊叫米芝蓮法國餐廳外賣嘅白酒田雞腿呀。」

 

　　「你咁辛苦踩單車，都抵銷唔到張外賣單嘅大卡啦！」

 

婦產科醫生：三人太擠迫

 

　　疫症與否，仔仍然要生。

 

　　一個肚子特別大的孕婦見醫生。

 

　　「田太，你已經違反咗最新禁聚令囉噃！」醫生笑笑口說。

 

　　「吓！診所豁免吖嘛。」孕婦急辯。

 

　　「你陀住雙胞胎，已經違反限二人嘅禁聚令啦！」

 

嚇人的醫生：死亡的問候？

 

　　醫生的說話，特別令人心跳加速。

 

　　檢查完畢，醫生對病人說：

 

　　「好在你嚟早一步。」

 

　　「吓！醫生，咁我仲有冇得救呀？」

 

　　「我係話，你嚟遲啲我就放咗工咧！」

 

　　還有，讚美也可能變成詛咒。

 

　　平時，有人驚歎：「原來你咁後生。」你會好高興。

 

　　當醫生如此說，就引起恐慌——咁後生就高危！

 

　　有時，關心的說話也變了揪心。

 

　　朋友請吃飯，說你喜歡吃甚麼就吃甚麼吧，大家都暢快。但當醫生這樣容許你任性，你肯定嚇到飛起，難道是食又死，唔食都死！

 

　　疫情當前，人類徘徊在病死、餓死、悶死、嚇死之間……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【etnet 30周年】多重慶祝活動一浪接一浪，好禮連環賞！ ► 即睇詳情