【做人上司甚艱難】必學4點 上司初哥管理手則

 

　　職場上，好多事情只要有人教、自己用心去學，基本上要學識其實唔難，但學做人上司／做管理層，則另作別論。第一次升職做人阿頭，「上司」對你嚟講係一件既遠且近嘅事情，雖然日日對住自己上司，但當自己做人上司時就會感到十分迷惘。而大部人第一次嘅經驗都係盲舂舂、邊撞板邊學習，再唔係就以以前上司作「榜樣」，但可惜最後發覺原來都唔係好work。

 

「先行宏觀，再行微觀」

 

　　職場上最乞人憎嘅上司，必定係只懂管你email嘅font size大少，但就永遠唔識comment你proposal內容嘅人。不論你係新手／老手上司都好，記緊要培養「先宏觀，後微觀」嘅習慣。下屬做完一個task必然會有瑕疵，但如果你身為上司次次都只懂「執字粒」，除咗令人討厭之餘，亦會俾人覺得你無料，之後下屬辭職時會同人講「跟咗呢個上司幾年，我只係學職執 font size」。做得管理層，execution嘅工作會慢慢減少，決策性／策略性嘅工作會漸漸增加，「執字粒」係重要但唔係最重要，而上司最重要嘅責任係要為下屬作宏觀嘅建議。所以以後就算啲font size點錯都好，唔好將呢件事無限放大，試下留返最後先講。如果佢宏觀嘅事情真係無嘢可以comment的話，咁亦代表你係時間諗諗比更高層次嘅事情佢處理。

 

「唔好飄，亦唔好強行建立氣牆」

 

　　做人上司喺大局面對唔好怯，呢個係人都知，但第一次做人上司唔好飄，對好多人嚟講就說易做難，有啲人甚至做咗幾年上司都仲飄緊。其實初初為人上司，或多或少一定會有飄飄然嘅感覺，再加上如果你遇到啲刷鞋下屬，唔覺唔覺一定會飄到上天花板。再者，升職後你亦好想建立一個上司嘅形象，好想有上司嘅「氣牆」，可惜咁樣其實好易令你做錯決定，最後會比人一種「揸住雞毛當領箭」嘅感覺。首先先唔好諗「如何建立氣牆」，上司嘅威嚴絕對唔係一朝一夕建立的，其實一個好上司，佢每一句話背後都蘊含好多歷練，呢啲你學都唔會學倒。所以如果一升職就有過份嘅威嚴，只會弄巧反拙。記住，只要你有料，每句說話都能夠字字鏗鏘，你係別人心目中嘅形象就會慢慢地建立起來，之後當你每次講野嘅時候，全世界自自然然就會因為你而靜下來。

 

「習慣孤獨」

 

　　大部份情況之下，公司同事係好難做真朋友，所以你升得越高級，你喺公司就會越寂寞，可以話係職場定律。就算你升到上總經理，又好多人成日搵你食飯吹水，但都未必係真朋友。職場上，唔係個個下屬都好識同上司溝通，就算佢係油腔滑調，亦唔代表佢真心想同你吹水。試諗下，下屬已經對咗你成日，放工又比你whatsapp 轟炸，仲要剛剛俾你執完字粒，之後又話要一齊食lunch，你估佢食飯時仲笑唔笑得出？做得人上司，有時要「識做」，醒目啲俾時間下屬發洩一下、俾佢哋講下自己壞話，其實係好正常嘅事。再者，下屬唔想同你食lunch、放工唔同你睇戲唱K，唔代表佢哋唔鐘意你，亦唔一定係搞小圈子。做得管理層，除咗要管「事」，仲要管「人」，工餘時間畀空間別人，亦係你要學識管人嘅其中一件事。

 

「為自己分工」

 

　　唔好覺得分配工作好似好易咁，其實好難，因為分配工作背後包括好多大意義，搞不好就會引伸出好多問題。工作除咗要因各人能力高低、「公平公正」地分配之外（你明啦，好多同事成日會投訴唔公平），最重要而最多人忽略嘅係，分工都要根據自己／下屬嘅前途而定，然後適當地將自己嘅工作／權力下放。好多新手／老手上司成日都唔懂得放手，無時無刻都親力親為，咁樣除咗令自己做餐死之外，亦代表你對下屬無信心，老細亦會覺得你有人唔用、唔識管人。如果真係對下屬嘅工作掛心，試下多從旁觀察，有需要時先出手，出手時盡量避免直接講答案俾佢知，試下俾個方向佢、引渡佢自己解決問題，咁樣下屬先能夠真正地成長。下放權力，同時為自己下一個階段作準備，未嘗唔係一件好事。

 

　　人唔係機器，無話邊一套嘅管理方式係絕對有效。但我成日都會講「人生就是一場不停嘗試的遊戲」，唔試過永遠唔知將來發生乜事。但要緊記以上要點，當你玩呢場遊戲嘅時候，千萬「唔好玩死別人，亦玩死自己」。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇