【職場麻煩人】同事，你問夠未？「不睇就問」的同事其實是時間小偷！

　　職場上，不恥下問係美德。

 

　　工作上遇到唔明白嘅地方，不論職位高低，虛心向人求教，值得表揚。

 

　　但不恥下問呢個美德有一個前設，就係你先要有付出，有嘗試努力去搵過答案。最終搵唔到，無辦法之下先去請教別人。

 

　　如果自己全無付出，或者試都無試過去搵答案就走去問人，呢種其實唔係不恥下問，而係「不睇就問」 —— 睇都唔睇，有理無理，問咗人先。

 

　　「想問下最新嗰個 output file 擺咗喺邊？」—— 其實所有 final output file 不嬲都擺喺同一個 share folder，係佢自己無 bookmark 條 link，定係第一日嚟返工？

 

　　「記唔記得個客話要印幾多本 brochure？」—— 同個客嘅 email thread 我同你都喺 cc list 入面，我睇到幾多你都應該睇到幾多，除非你根本無睇過個 email。

 

 

　　唔知大家身邊有無一啲係唔係都問人嘅同事？呢類同事經常會令人處於兩難：花時間答佢呢啲咁簡單嘅問題，好似浪費緊自己嘅 working hour，唔答佢又好似好無禮貌。

 

　　不睇就問嘅同事大多數都係睇人嚟問，即遇到相熟、較 junior，或經常有問必答嘅同事，佢哋會更加有恃無恐。要減低呢類同事嘅倚賴性，其實要先從自己著手。遇到一啲理應大家都知道答案嘅問題，你應該有禮地狠心拒絕，例如「Output file 不嬲都喺嗰個 folder，我仲記得你上星期先有上過去 download，自己睇下啲 history 啦」；又例如「個客前兩日個 email 有寫 brochure 數量，你可以睇返」。

 

同事，你問夠未？

 

　　以上答法聽落有啲不近人情，但如果對住一啲長期不睇就問嘅同事，有禮地狠心拒絕其實係一個有效防止情況惡化嘅方法。如果繼續從善如流、有問必答，只會助長呢類同事「偷取」自己同其他同事嘅時間，以換取佢自己一個人嘅方便。

 

　　職場上，不恥下問係美德，不睇就問係缺德。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》身體唔舒服查唔到原因？周身痠痛疲累？可能係患有心身症！點解原生家庭會長時間影響一個人？點樣脫離循環？► 即睇