心慌慌睇報告

　　上期標題——抽足七筒血！附帶登出七支抽血管照片。一如所料，引起老友間的「震撼」。

 

大量本港海外親朋戚友及網上粉絲皆想知呢七筒血驗出甚麼？

 

　　無他，好奇、八卦及關心，乃人類天性。見到你要抽大量血，當然想知有乜結果啦。

 

別人關心我、刺探我、八卦我，全屬正常心態，一律歡迎。

 

　　其實，靜靜話你知，就算在醫院工作的資深護士及醫生，也對睇報告有點忐忑不安心態。因為——開呀！可能發現身體有大問題！

　

　　小弟是正常人，當然睇報告前，也有多少心慌慌。尤其今次驗多味Cardiac Risk（心臟危險），一日未出報告，一日無法放心。

 

見醫生看報告時，人人心情忐忑。

 

　　再講老友點解咁「關心」我健康呢？因形象上，我永遠大吃大喝，乜都食，酒又晚晚飲，從冇話戒口戒油戒甜。若咁都冇事，天公「好唔公道」啫。故潛意識，點都希望我「中」多少，以平復自己戒呢戒路乜都避忌的苦況。

　

　　結果又如何？

 

現代化驗，非常精準，可找出各種潛伏性疾病。

 

　　開呀！上周準時十點半坐正QE專科醫生診症室門口，等呀等。凡見過公家醫生者，都知等一個半個鐘，正常兼閒事。最大劑，突然聽到嗌咪：「十七號房醫生正在房搶救病人，將稍遲應診，請耐心等候！」

 

　　呢個「耐心等候」，完全冇譜㗎。可能隨時變遲兩三小時。作為病人冇得揀，只有一個選擇——死等。

 

　　十一點十五分，咪嗌「曾智華入十七號房！」

 

　　推門入，L醫生與所有公家醫院醫生一樣，望住電腦多個望你。七筒血報告逐張閱讀。然後，半自言自語半向我講：「膽固醇，合水平。三脂甘油酸，冇超標。冇糖尿病。肝腎功能正常……」

 

　　聽到呢處，放心左大半，即乜都冇事。剩返一樣！究竟答案係乜？

 

　　「Cardiac Risk讀數0.6 ……（即係乜意思？）唔使心急。嗱，曾先生，呢個化驗，主要睇你血管粥樣硬化程度等等。若讀數超過一，就要做其他檢測跟進嘞。你0.6，即心臟血管未來五年都唔會有即時危險！六十七歲咁狀況，好好。keep住呢個飲食生活模式。另外，有恒心運動就得㗎嘞，年底見啦！」

 

驗血，連未來幾年心血管安全度也可預測。

 

　　嘩，發達，即係又可以「大吃大喝」喇！

 

不少人誤會我天天「大吃大喝」。其實，我只在享受與朋友共餐之樂。一切飲食，適可而止。

 

　　「曾先生，若有病人維持健康講座請你做分享嘉賓，得唔得呢？」

　

　　「當然得！我最喜歡將親身快樂經驗與人分享，隨時call我啦！」

 

我願意將所有人生經驗與大家分享。當然包括維持健康的心得。

 

　　由心慌慌到似識飛，心態轉變過程只十五分鐘！

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好