《經濟不停學》喪印銀紙買嘢有反效果，歷史上嘅瘋狂通脹

　　世界各國喺呢個疫情期間不斷放水，隨之以嚟就係對通脹嘅擔憂，見最近啲資源價格係咁升就知啦！不過，主要央大多聞「加息」就色變，股市仲會跌畀你睇。回望歷史，有啲政府因為一時嘅需求或者冇諗過後果嘅行動，狂印銀紙，導致國內物價飆升，出街買嘢要好似擔泥咁，真係慘慘豬。

 

通脹：供不應求價向上，貨幣購買力下降

 

　　首先要講下乜嘢係通脹（inflation），通脹即係產品同服務嘅供應量跟唔上需求上升速度，呢個時候生產商就可以持續調高價格，令整體物價向上，而貨幣購買力就下降。

 

　　而套用返央行狂印銀紙呢個case，如果新發行嘅貨幣係流向生產端，產品同服務供應多咗，反而有機會造成供過於求，物價下跌。所以印銀紙同通脹未必有直接關係，好睇啲新錢用嚟做乜。

 

國民黨要錢補貼軍費，金圓劵平過陰司紙

 

國共內戰－一場因意識形態分歧而起慨戰爭。（資料圖片）

 

　　歷史上其中一次最瘋狂嘅通脹就發生喺1949年前嘅中國，橫跨咗抗日戰爭至國共內戰時期，持續咗成十幾年。當時中國揸緊旗嘅係國民黨政府，1935年廢除銀本位制度，推出叫法幣嘅法定紙鈔，同英鎊、美元掛鉤。抗日戰爭前，法幣嘅總發行量唔超過14億元。但係去到英美參戰前，日本仔以搶奪、買賣走私物品等方式套得法幣，目的係令國民黨唔夠錢打仗。其後國民政府果然要開始印銀紙買物資，到咗戰後，面額總值已增至約5569億元，比戰前增加約400倍。據講，戰前同樣價錢可以買一隻牛，變咗買得兩隻雞蛋。

 

　　不過當時嘅通脹水平未去到接受唔到嘅地步，去到國共內戰先嚟料。同樣因為軍費問題，國民政府喺１９４８年發行「金圓劵」，發行量大增至1948年8月嘅604萬億元，惡性通貨膨脹終於出現。喺清明節，拜山居然搵啲真錢嚟燒，因為仲平過冥通呀。

 

　　而歷史事實係國民黨去咗台灣，共產黨揸旗，中華人民共和國成立，喺1950年3月，政府決定統一全國財政經濟工作，建立財政管理體制，通脹亦係喺差唔多時候受壓。之後人仔就做埋中國法定貨幣。

 

津巴布韋生產大幅下滑，出新貨幣都冇法應對通脹

 

　　時間離依家較近嘅有津巴布韋通脹。津巴布韋係非洲工業較發達嘅國家，以出產優質鱷魚皮而聞名，自然資源亦豐富，工農業基礎好好。但自2000年以嚟，因為實施「快速土改計劃」，原本擁有土地嘅白人被武力驅趕，農場重新分配畀冇土地嘅本國黑人同政治關係良好嘅人，但呢啲人冇能力管理農場、導致國內生產急劇下滑。計劃亦招致西方國家不滿，對津巴布韋實施經濟制裁。 

 

 

全世界面額最大嘅100兆紙元紙鈔。（shutterstock圖片）

 

　　為咗發展番經濟，政府同央行努力印銀紙，想通過增加居民的消費拉動經濟增長，但係就令到國內物價飛漲。喺2004年，通貨膨脹達到了624%，經過政府調控，隔年通脹率低於三位數，但係到2006年又飆至1730%。政府於是用新的津巴布韋元以1:1000的兌換率取代舊貨幣，但依然冇用。喺2009年，100萬津巴布韋幣只可以買一張車票，一包薯片要500萬津巴布韋元，津巴布韋人可以做到名副其實既「兆萬富翁」。雖然經歷多次貨幣改革，但喺同年年中，政府宣佈停用津巴布韋元作本國貨幣，啲人交易多數用美金、日圓等。

 

　　前年11月津巴布韋重新發行首批新津元，結束十年冇本國貨幣嘅局面，面值5銀，但係通脹高企問題未有改善，上年再發行咗10元同20元面值嘅新津元，最近又有傳今年會出50元、100元、200元面值嘅新津元。睇嚟好快就會知道，津巴布韋會唔會重覆相同嘅錯誤……

 

撰文：吳藹林

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好