呢排好多人做錯事，但認錯喺呢個年代好似好old-school咁，搞到要勞煩公關，又勞煩關公，忙到不可開交。

 

　　特首一家人嘅旅行袋事件擾攘一個月，最後佢一家人冇認過錯，又俾佢過咗骨，但係關公多次被送出嚟受罪。群育學校風波，屯門仁愛堂陳黃淑芳學校校長蔡國光做馬前卒出嚟反對東灣莫羅瑞華學校遷校去佢哋隔離，被全城圍插，道歉收場。最型都係黎明，憑幾條親自出鏡嘅facebook片，第一時間有錯就認，嬴盡掌聲。

 

　　點會估到咁多單公關災難之後，仲有人繼續唔明白點樣化解？今個星期初一粒大花生，原本由網上一個貼文引起，到而家成為報紙頭版跟進，仲要幾乎毀咗一間補習社嘅全部聲譽。

 

　　5月7號星期六，一個高登會員post咗一篇文，寫明「[真人真事] 我和補習老師上床了」，題目咁爆，即時引起注意，內容係講女事主上年開始上一個通識科補習名師嘅堂，名師向佢展開追求，並多次明示同暗示要求同女事主發生性關係，結果關係發生了，但女方卻仍未能向男方確認情侶關係，之後佢就經朋友account寫咗篇文擺上高登。

 

　　事件爆發後，好快啲人就確認補習名師係「燈塔馬神」，亦即係以燈塔作為校徵標誌嘅遵理學校通識科名師Oscar Ma。第二日，5月8號下晝，遵理學校校長June Leung 梁賀琪（被戲稱為「六月娘」）喺facebook貼出一張楊過同小龍女嘅相，指自己反對師生戀，亦禁止旗下老師與學生談戀愛，呼籲聲稱佢哋嘅老師要同學生發展關係嘅人向佢「現真身」，指自己會保護證人，但又強調叫人唔好抹黑佢哋，補咗一句「小朋友，位，並唔係咁上的！」Oscar Ma喺自己facebook附和，叫人唔好抹黑，否認涉事，又指自己會搵律師應對抹黑言論。另一名遵理補習名師Kelvin Lau就留言話「可能有人實力不足，唯有走歪……可悲……」但過一陣就自己delete咗。

 

 

 　　從此就展開「揤牙膏式」嘅爆料，事主隨即在高登貼出多張WhatsApp及Facebook chat的截圖，顯示一個叫Oscar Ma嘅人在多次向女學生提出性要求，又聲稱自己鍾意對方，但二人發生性關係後，男方態度轉趨冷淡，又要求個女仔唔好「響我忙嘅時候煩我」。

 

　　5月9號凌晨，Oscar Ma去咗報警，並且學習黎明，喺facebook做live講自己去報警，期間聲淚俱下，強調自己冇同女學生性交。警方列作「雜項事件」處理，網民恥笑同質疑，如果係誹謗嘅話，屬民事追究，點解唔係出律師信而係報警。

 

 

　　之後越來越多證據出嚟，高登爆料人貼出一張相，一隻小哥基挨住張床，聲稱係女事主喺Oscar Ma屋企影，當日上晝馬生喺FB又做live，話啲哥基相係佢同女朋友影，而因為佢哋間唔中會擺小狗嘅相上論壇問哥基嘅問題，所以認為該爆料人純粹係偷圖。但又被眼利網民發現，佢擺落嚟嗰張相同前後嘅相背景唔連貫，而且該相片大小喺佢電腦顯示得43.5KB，傻嘅都知目前唔會有相機影出嚟嘅相咁細size，「若要人不知，43.5KB」成為事件金句。

 

 

　　到5月9號夜晚，女事主出動終極武器，上載高清版片段影自己部電話，證明自己冇偽造同Oscar Ma之間嘅對話。

 

 

　　遵理隨即轉軚，喺10號凌晨1點，宣布成立由三名獨立人士組成的委員會調查事件，馬神停職。Kelvin Lau同June Leung亦都喺瞓醒之後先後出post，同馬神劃清界線。到今日凌晨，馬神宣佈即日起離開崗位，但係，都係冇道歉冇認錯嘅，只係話唔會就事件再回應，以及為身邊人帶來不便抱歉！

 

 

　　我覺得一日最衰都係黎明。黎明當初喺facebook上載片段，向第一場睇唔成演唱會嘅歌迷致歉，完美化解公關危機，公關同關公都唔使出場。唔係黎明，馬神唔會諗到用呢咁聰明嘅方法，用facebook live就以為自己同大家「開誠布公」。公關嘅基本原則，係你想表達嘅嘢，係真實無誤，而唔係建基於謊言，而家淪為東施效顰，源於一開始名師一方謊話連篇。

 

 

　　June Leung 更加經典，用成間補習社嘅聲譽押上去，係幾感動嘅，無條件包攬下屬。空穴來風，原來唔覺得有因。又用上奇招，喺凌晨時分宣布成立委員會調查事件，遵理特別行政區政府正式成立，女梁特首向男梁特首學足全套，睇嚟港澳辦要出聲明讉責「遵獨」。

 

 

　　睇返個委員會，聲稱搵咗三位「獨立人士」，其中有高登CEO林祖舜，係咪即係搵佢刪post？咁係咪都算係利益衝突？Oscar Ma辭職後，遵理聲明話委員會會轉移檢討，就同類事件提供更好改善方案，下？？即係貴學校expect會再有同類事件？唔通你哋都覺得重有其他老師有犯類似嘅錯？

 

　　但係諗落，替Oscar Ma感到少少可憐。某家特權人士，暗渡陳倉運行李，打爛法律規矩，多番狡辯，一句都冇認過錯，而家重繼續尸位素餐。Oscar Ma暗渡陳倉食學生，懷疑專業失德，就要辭職收場了，啲咩委員會都保唔到你，但講真，委員會幾時有用過呢？

 

　　現今社會愛情觀開放，師生戀屢見不鮮，係咪真係專業失德，可能同過往嘅標準已經有唔同，但係有做過唔認兼(口趙)完鬆，就係真正嘅犯罪，預咗被踢爆嘅後果，冇特權嘅人，同埋有特權嘅人都唔應該有得倖免， 借用黎明金句，最重要就係：「明人不做暗事，暗處有狗咬腳。」被咬腳，係自找返嚟。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】東南亞藝術市場是下一個熱點？一探各地獨特及吸引之處！► 即睇