氣候異常，北極海面9月後本應步入冬季，海冰面積回升。全球暖化之下，近年海冰覆蓋面積愈嚟愈細，但始終未逆轉呢個趨勢。今年奇怪啦，過咗9月，北極海面除咗永久冰層之外，其餘海面久未結冰，嚟到11月，同8月個覆蓋面積仍然相若，比起常年覆蓋面相距甚遠，似乎未來幾個月，北半球嘅冬天可能出現比起舊年更加光怪陸離嘅氣候，連天文台台長都喺自己facebook話：「愈嚟愈大鑊！」 

 

　　全球氣候好大鑊，熱到七彩，好大鑊。香港嘅民主派、反對派，都好大鑊，不過係步入嚴冬，因為北京一派已經決定全面開戰，要將一切反對之聲撲熄喺萌芽之時。上星期，香港都仲係夏天，但今個星期已經驟變成冬天嘅氣候，秋天直接skip咗，呢啲咁嘅天氣，最啱做咩？唔係打邊爐，而係秋後算帳。

 

　　上個月19號立法會嘅流會鬧劇，兩位非保皇議員，長毛、鄭松泰，嚟到今日，因為兩段小插曲，而成為被威權針對嘅對象。長毛當日預備好午餐肉，準備喺保皇黨搞流會時攞嚟演吓嘢，喺保皇黨出嚟獻世埋咪兜時，向啲咪拋擲午餐肉。民建聯嘅陳恒鑌一個還擊，將舊肉掟向長毛，辣慶咗佢，長毛一路大聲問「邊個掟我！？」，一路整個靚回傳，舊肉不偏不倚，猶如岸邊片石仔，片到偉大嘅馬逢國議員嘅光明頂，上演一場《午餐辱國馬肉國》，警方相隔一個月，先至公開，原來當日馬逢國決定要報警，為自己個額頭取回一個公道。

 

　　警方將列案件為普通襲擊，不過未拘捕任何人，唔知陳恒鑌而家呢一刻有冇好似《人民日報海外版》咁講，感到不安呢？有特定目標同冇特定目標咁「拋擲」，唔知邊一樣易入罪啲呢，睇嚟都要人大僭法搞搞佢啦。

 

　　鄭松泰就因為喺上月19號點人數鐘聲響緊時，走埋去保皇黨嘅座位，將枱面上嘅國旗同區旗裝飾倒轉嚟擺，民建聯嘅新議員劉國勳當日已經立即報警，話鄭松泰侮辱國旗；「西環之子」謝偉俊趁僭法乘「勝」狙擊，放風話想動議彈劾鄭松泰，因為佢涉嫌違反基本法104條。好呀！鄭議員嘅無聊舉動應當被遏止！就不如一齊遏止埋，喺啲愛國愛港活動之後，參與者將啲國旗掟晒落垃圾桶呢啲暴力，粗暴嘅行為！告到佢哋甩褲同共產黨認錯！

 

　　長毛同時間牽涉另一件「案件」，佢喺會議上搶走發展局副局長馬紹祥嘅文件，隔兩日後，馬紹祥報警。而另一方面，奧雅納顧問公司喺枱底之下挪用政府內部數據助私人發展商新世界申請改劃土地用途，局方為咗懲罰奧雅納，唔畀佢投標大拿拿三個月，其他法律追究權利呢？保留、保留。政府真係一視同仁，好公平呀！大家說對不對？

 

　　秋後算帳嘅打擊面一定要夠闊，解決咗「糧油」小卒，放慢宣誓嘅劉小麗、質問廉署嘅林卓廷、發夢宣誓嘅黃定光、雙重國籍嘅偽中國香港議員、高呼反釋法嘅愛國人士、反對立23條嘅和理非泛民、唔肯學普通話嘅真香港人，全部都要封殺！因為任何一絲無視基本法、反對政府施政嘅行為，最後都會演變成港獨嘅種子！

 

　　保皇黨同埋狼政府全面開戰，唔似係純粹為啖氣咁簡單，更加唔係為公義啦。表面上睇，一路追殺，隨時又多一兩個議席可以掹落嚟，到時連地區直選都過埋半，到時成個議會都為所欲為啦。當權者就為鞏固權力，政權、錢權都要緊緊牢固，嘩你阻我發達喎我緊係同你死過？

 

　　有個底因似乎更加近磅。人大僭法後，以「港獨」借力打力，見到坊間對僭法冇乜大反應，借勢一舉打沉反對派，將最雞毛蒜皮嘅抗爭行動，吹到成為罪無可恕嘅犯罪行為，有幾大得幾大。嘩，午餐肉可以殺人㗎！嗱，國旗倒轉係反中亂港！哼，批評特府就係衝擊一國兩制搞港獨！呵呵！從此香港超越澳門，成為全國最聽話嘅特區（還掂得兩個，不用分得那麼細）。

  

　　保皇黨玩得興起，有一日我呢篇文都成為被批鬥、被追究嘅對象絕對唔出奇。繼續玩啦，有一日你哋覺得事情去得太盡，想返轉頭時，就會發現「他朝君體也相同」，一個本身可以自由批評政府、參與政治嘅城市，就咁畀你哋玩謝咗，因為你哋一個二個，都有份成就，呢個逼害異見者嘅國度。 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇