邊有咁多假波吖！

　　睇完頭三日16強，愈來愈覺得所謂強隊與弱旅之間，分野真係冇想像中咁大，頭六場波三場要加時，另外兩場要去到最後十分鐘甚至補時先分勝負，贏得清脆只有賽前被低估嘅哥倫比亞。

 

送熱情嘅墨西哥fans走人，我最唔捨得。

 

　　德國加時僅勝阿爾及利亞相當艱苦，巴西互射十二碼贏智利叫有運，荷蘭反勝墨西哥就直頭係屈機，不被普遍球迷所接受。

 

　　可以見到，世界杯勝負除咗紙上談各位球星嘅質素、11個球員加埋嘅表面價值外，仲有一大堆其他原因，值得大家研究，唔使下下都用假波嚟總結嗰啲你估唔到嘅賽果。

 

　　今屆好多被睇低一線嘅分子，都交出多一份你事先計唔到嘅拼勁，代表者係哥斯達黎加，正如04年歐國杯冠軍希臘一樣，拆開隊波逐個睇無特別，加埋起嚟就判若兩隊。

 

　　鬥心何來？因為國力懸殊，唔少大國球員已有名有利，捧杯捧唔少，最佳例子緊係西班牙班大哥，鬥心係有，不過之前用晒。

 

　　我最唔抵得嘅，莫過於係墨西哥出局。面對強勢嘅荷蘭，未開波時我仲諗住墨西哥會擺鐵桶陣引荷蘭大蛇出洞，點不知一開波就搶攻，壓住荷蘭嚟打，加上適應美洲嘅艷陽天，以及人山人海嘅球迷，真係主場一樣，有部署有策略有決心，咁樣打落去如果墨西哥贏咗，其實又點算爆冷吖！

 

　　反而荷蘭最後反勝就真係難估，全靠兩位星將的個人之力，史奈達衝力射球人人拜服，但洛賓嘅12碼我就認為完全係博番嚟。

 

　　難得香港網上主流意見係幫表現不幫名氣，呢種態度好值得欣賞。捧還捧，甚麼是好波甚麼是流料都係要分得清，打得唔好輸係應份，下下符碌贏嘅話捧杯都唔型啦，就算我自己嘅愛隊都係咁話！

 

轉載自晴報

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】當局料聖誕新年期間逾1300萬人次出入境，較去年同期大增。你對本港聖誕新年市道是否有信心？會否出境旅遊？► 立即投票