每一場都係bonus

　　成日聽啲球隊賽前話「呢場波我哋當最後一場咁踢，搏到盡！」呢種態度認真一流，啱晒大家學習！係呀，球迷支持自己愛隊，贏梗係最好，但如果一早做好心理準備，當輸嘅時候，就唔會傷心到人又唔想見、飯又唔想食、工又唔想返啦（好明顯最後呢樣幾時都係打工仔心願！）

遇上一班香港同學仔睇阿根廷踢世盃，無論愛隊最後贏輸，約定下屆再出發。

　　呢番說話其實係講畀自己聽嘅！我多少都係勝利球迷，不過唔係話邊隊贏捧邊隊嗰種，你知我都係死牛一邊頸嘅fans，我永遠迷信自己隊波就係真命天子，覺得呢個足球世界就係圍住佢嚟轉，所以每場佢都應該贏，每次世界盃佢都應該捧盃！

　　但我最近一次見到阿根廷贏世界盃，就係16歲嘅中學時代，但跟住讀大專、返工、做人老公老竇，身份在變，但阿根廷成績冇變，即係冇好過，次次盛興而來，無癮而回！

　　又如何？Down完兩日又重新嚟過，橫掂我又唔會變心，再等下次囉！

　　8強今晚開戰，各位心有所屬嘅球迷們，當佢最後一場盡情享受啦！表現好就讚，表現差就加油，贏咗當bonus，出局試下搵個位讚對手，唔係贏咗你就一定係壞蛋嘅！有胸襟嘅球迷好吸引；而有胸襟又忠心嘅球迷，最吸引！

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票