東寶小館 老闆跳break dance娛賓

　　同事對德國白酒有興趣，便找來對德白素有研究的靚仔酒友開餐及試飲幾支德白。一行八人便相約到離公司不遠的東寶小館酒聚。

 

食物

 

 

　　鮮雞潤，幾新鮮，厚度切得適中，不錯的前菜。

 

 

　　芽菜雞腎皮，雞腎皮比較韌，唔合格。

 

 

　　炸鯪魚球，熱辣辣同香脆，不過魚肉打得唔夠彈牙。

 

 

　　沙拉骨，醬汁酸酸哋芝麻味易出，好開胃。

 

 

　　焗魚腸，面層再可以焗得乾身同脆一些，不大魚腸味同有少少苦，唔合格！

 

 

　　椒鹽鮮魷，這道菜最失敗，粉太厚同鮮魷在炸之前應該造得唔夠乾身，形成面層唔脆，而且粉同鮮魷有分離感覺，亦唔覺有椒鹽香味。

 

 

　　風沙雞，皮炸得好脆，而且好入味，雞肉都算滑，不過冇雞味。

 

 

　　煎鹹魚肉餅配豬仔飽，幾特別的一道菜，麵包仔烘得熱辣辣兼脆身，夾上肉餅再加芥辣、洋蔥，好香口。

 

 

　　黃金蝦，好香的鹹蛋味，最驚喜係隻蝦好脆身，可以連殼都食埋。

 

　　當晚飯錢每人二百蚊，唔係味味餸都得，要懂得選擇。

 

　　常聽聞這裏服務差，不過就當日所見，服務高於一般街坊小炒店，伙記落單快手、會主動換碟，九時後老闆會播放強勁音樂兼跳break dance娛賓，只要你投入，同老闆吹吹水，聽吓音樂，隊吓酒都幾開心。

 

德國白酒

 

 

　　全部四支酒都是用Riesling葡萄釀造，除了最右方那支是甜白之外，其餘三支都是乾白(Trocken)。甜白口感帶甜，某程度上比較難配食物，不過席間有女士話好甜，最重要自己鍾意，何需顧慮太多。

 

　　當晚四支酒香氣最出係Ökonomierat Rebholz，其酸也十分優雅和細緻。而酸度最足是Loosen，而Christmann就取其中庸之道。

 

 

　　用戰鬥碗隊啤會令戰鬥力提升嗎？

 

溫馨提示：

 

　　1. 每日下午2時30分至5時30分才接受訂座，其餘時間一定冇人接聽電話。

 

　　2. 一般熟食街市環境，比較嘈雜。

 

　　3. 自攜酒每支收$30。

 

東寶小館

地址：北角渣華道99號渣華道市政大廈2樓

電話：2880 5224

營業時間：下午5時30分至凌晨12時30分

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

想要獨家投資理財Tips？即Like etnet 全新Facebook專頁► 立即讚好