香港，亂局未解，本身係香港自己搞嘅政治旋渦，牽扯到去中美兩國之間，成為中美貿易戰之中其中一步棋。依家所有嘅香港人就好似喺十號風球之下登上獅子山頂，帶頭嘅行錯一步，全體攬炒。

　　日前睇到有段新聞，更加令到Tina認為，政府，特別係林鄭特首自己本人，應該要好好諗下，香港條路應該點走落去。段新聞係講述少年警訊一個夏令營，因為參加人數不足所以今年大會要取消呢個活動。

　　新聞入面無詳細分析點解夏令營參加人數不足。可能係連場嚴重衝突，啲少年警訊會員嘅阿爸阿媽唔想小朋友參加，避免不必要嘅麻煩，但更悲觀嘅睇法，係唔少少年警訊已經對警察嘅角色感到無所適從，甚至小朋友自己本身都對警察有嚴重不滿以至仇視。

　　答案唔知係乜，但Tina有朋友嘅仔女，下一學年升小六嘅，睇到721元朗事件、睇到防暴警嘅連串行動後，都真係對警察產生咗厭惡感，未至於開口埋口以「黑警」去話警察，但都會好嬲咁話：「點解要咁樣對其他人？！哥哥姐姐去示威有錯咩？」得罪咗一代人嘅講法，絕對唔可以當係笑話，繼續收埋自己喺禮賓府視而不見，你失去嘅唔止係一代人。

　　超人李嘉誠再次援引「黃台之瓜何堪再摘」呢個典故。超人2016年已經提出過一次，當時都無指明「黃台之瓜」意之所指，所以就各有各嘅睇法。如果按照原詩作者、武則天兒子李賢嘅意思，「黃台之瓜」指嘅就係子女，暗喻武則天唔應該再逼害唐室嘅子女。喺Tina嘅角度睇，「黃台之瓜」所指嘅應該係無權無勢嘅人民，人民就好似佢嘅子女一樣，對於掌權者嚟講實在係唔應該苛待自己子女。

　　當然，超人咁高，Tina呢啲民女當然都係估估下。但如果我地從少年警訊夏令營事件去睇，政府之後只係搵警方強力壓制，「武力摘瓜」，逼使下一代年輕人繼續與警察為仇、視政府為敵，我好肯定今次亂局就算喺難以想像嘅武力之下能夠平息，不久嘅將來，更嚴重嘅衝突必然會出現，香港嘅暴力抗爭只會無日無之。

　　依家香港嘅亂局，唔係簡簡單單一句叫抗爭者放下成見就可以解決，必定要由「最終權力話事人」悉出善意，切切實實回應訴求先可以拆。

　　摘瓜定係種瓜，只喺當權者一念之間。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情