【Meeting攻防術】當你正在present，那個專做損人不利己事的同事開口了…

　　好多人都唔太喜歡開會，除咗覺得浪費時間之外，亦好怕面對喺會議室內不同嘅壓力，又怕喺眾人面前present出錯、又怕老細問埋啲點答都死嘅問題，加上如果有啲乞人憎嘅同事喺會議中開戰，有意無意下作出損人不利己嘅攻擊，務求令你喺老細同眾人面前出醜。所以送上Meeting攻防術，就算唔「攻」得，起碼都「守」得～

 

重要時刻打斷別人 

 

　　呢一招大家一定要知，但唔好去學，因為係有啲乞人憎。可能大家都會有經驗，開會時一定有啲人好鍾意無啦啦打斷別人嘅對話，打斷嘅方式有好多種，有時打斷你「幫」你作出無意義嘅clarification，又或者喺你用Power Point present proposal時，扮專心咁問你「可唔可以去返上一頁」，之後又扮睇完「OK，你繼續」。但當日子耐咗你就會發現，呢啲大部分都係無意義嘅小動作（當然啦，如果你講得太衰比人打斷又另計），佢哋目的只有一個，就係來一個間接攻擊。需知道大部分人都未必係一個厲害嘅presenter，一個不期然嘅打斷或多或少都會令人窒一窒，打擊經驗淺嘅 presenter 信心，令餘下落嚟嘅present 表現失準。同時間，佢又能夠藉著呢啲「clarification」去話比人知佢好有料，呢招可以話係一石二鳥。 

 

 

質問、質問、再質問

 

　　喺一般會議中，大約有一半嘅人對會議係無乜貢獻（其實佢哋分分鐘對公司都無乜貢獻），但佢哋就好鍾意不停去質問其他人，質問內容無論點亦無方向，為攻擊而攻擊「你哋呢個方向好錯囉（但又唔講乜嘢先係正確）」、「如果依你direction去做，你知唔知會發生乜事，Peter你講（可能佢自己都唔知，所以先問第二位同事）」。搞咁多野，就係想證明自己嘅存在價值，當質問完一大輪，引起全世界嘅注意後，佢就會話自己有急事先行離開。走得咁快，係因為佢哋自己本身都無諗過點解決，怕比人識穿只好走為上著，而且留低一個議題先離開會議室，感覺上係有一點點清高。其實要對付呢啲「咁有」貢獻嘅質問，最好就立刻反擊，而反擊嘅提問亦要精準，如果你睇得出對方係無乜「墨水」的話，不妨多加追問「可唔可以比個實質、具體嘅例子」，如果佢並非正面回應，只要再加句「之後呢？之後呢？」，追問多幾下，應該好快就不攻自破。

 

開會約9am

 

　　有時明明各位同事時間都好鬆動，但有啲人就好鍾意約9am、lunch前後或者放工前開會，不過後來慢慢發覺，佢哋約埋啲咁陰濕嘅時段開會，其實都係一種攻擊。佢哋明白到，唔係個個同事都能夠準時9am返工，又或者有啲同事係要準時放工，如果約呢啲時間開會，必定有一班人遲到／早退，就算佢哋能夠準時9am返嚟開會或者唔早退，雖然個肉體喺度，但靈魂都唔存在，工作能力亦會減半，所以佢哋約呢啲時間開會，某程度上係掘個窿比你踩，等你係老細面前遲到同出醜。但呢啲陰招知道就夠，千萬唔好學，因為見過有啲人想學，但最後遲到嘅，就係佢自己～

 

　　待續……

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇