【Meeting攻防術】提防辦公室小人，你要學識呢幾招……

　　上回提及到好多Meeting上嘅陰招，朋友／讀者睇完之後都好感興趣多學幾招，但我建議呢啲招式用嚟提防下就算，可以的話盡量避免使用，一來「大將不行小路」，二來用得唔好，只會弄巧反拙，最後搞著自己。所以今回會講多少少防守心得，希望大家真係可以學以致用。

 

避免扮抄notes

 

　　會議中最多出現嘅，就係一味低頭勁抄notes嘅人，佢哋害怕同老細有眼神接觸，因為唔想畀老細點名答問題，但同時又唔想畀老細覺得自己喺會議上無野做（雖然係），只好扮抄notes避開追擊。但可惜同一招次次都用，好快會被醒目嘅老細／同事識破，所以呢啲時候最好先下手為強，大家唔怕多啲向老細提問（當然係有意義嘅問題啦），咁樣老細唔會再問你嘢之餘，亦會覺得你專心。另一方面，個人覺得同老細有眼神接觸並唔可怕，反而如果大多數人都迴避老細眼神時，你更應直視以表信心，間中對望時亦可以點頭表示認同、支持。就算老細真係問你而你又答錯，其實亦無乜大不了，但起碼唔好畀佢覺得你成日都好驚青，連對望都怕，咁樣又點會比重要事情你辦呢～

 

 

小心錯執人口水尾

 

　　記住一點，「執人口水尾」同「作有用總結」只係一線之差，要小心唔好錯入「執口水尾」行列嘅同時，亦要看穿他人幾時喺度作「無貢獻嘅總結」。第一件事要注意嘅係，當會議內容散亂時先好作總結，而總結最後必定必定要加入一啲之前會議內無講過嘅建議，可以係你總結後對事情嘅睇法。如果你最後真係無乜睇法、又無insight嘅話，最簡單你可以提出「what's next step」，幫手分工並盡快完結會議。喺會議上能夠掌握「作有用總結」嘅人，往往會比人一個舉足輕重嘅感覺，無形間成為會議嘅主導者。主導者除咗能夠對會議作出貢獻之外，同時亦係救大家盡快離開會議室嘅救世主。

 

多點頭、多對望

 

　　台下與會者嘅點頭、對望等等嘅小動作，其實對台上嘅presenter係好重要。如果你遇過一啲好上司，當你喺眾人面前present時，佢會keep住望你，間中亦會點下頭，目的係為咗幫你增強信心。因為經驗淺嘅presenter好害怕同其他陌生人有眼神接觸，好多時會出現「對眼唔知望邊」嘅情況，最後會「搵人望」或者「放空」，但眼神「放空」其實係愈「放」愈衰，一畀人提問時就會好易走神，所以一個熟悉嘅眼神係好重要，能夠令presenter 個心安定下來，再加上一啲點頭嘅動作，其實係表示同意嘅意思，會令presenter 慢慢增加信心，呢啲都係聽眾對presenter一種無聲嘅助攻。當然啦，你老細唔係望住你，而係厲住你嘅話，咁你開完會之後就要小心呀～

 

　　會議室猶如戰場，開會時 department與 department之間、同事與同事之間互有攻守、危機四伏。被人攻擊成功的話，不但令老細對你減分，同時亦幫咗別人加分。但有危亦有機，如果你能夠喺會議室內發揮到重要影響力的話，亦代表住你喺老細或同事心中佔一重要地位。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇