【求職小貼士】勿掉以輕心！誰說Application letter不重要？

　　3-4月係好多公司嘅fiscal year，所以公司如需要增聘人手，好多時都會喺呢段時間發生，亦可能因為咁，近來多咗讀者朋友問及有關搵工嘅事情。其中一個較多人問嘅問題係「其實application letter有冇人睇」、「搵工係咪一定要寫application letter」，今日藉此講多少少。

　　當然，application letter一定有人會睇，不過睇嘅人唔太多。其實當公司收到求職信時，如果係細公司嘅話，老細或直屬上司會自己直接處理求職信，而佢哋都好實際地只睇CV，唔睇application letter。而大公司請人，HR事前會向部門主管了解是次聘請嘅內容，知道佢哋今次需要請乜嘢人，人工大約幾多等。之後HR通常會用份letter幫部門主管作初步篩選，繼而再睇CV。當求職信到咗老細手上時，佢哋亦只會直接睇CV而唔睇application letter。所以呢封信嘅主要對象同用處，好多時都係HR，而唔係老細。

　　至於application letter嘅必要性有幾高，其實好視乎你嘅年資同職級。如果你應徵嘅位置愈高級，呢封信嘅重要性就愈低，換句話說，如果你係剛剛畢業嘅初哥，呢封信其實係幾重要。因為對HR／老細嚟講，用作評核初哥嘅指標唔多，所以呢封信就會變成其中一個指標，如果你應徵嘅係大公司應該會更甚。但如果你應徵一個中／高級嘅職位，通常你嘅CV都只會直接比老細，所以基本上application letter就會變得可有可無。

　　假如你一直以來send CV時都習慣send埋application letter，就要留意如何將其定位同CV 分開，兩者應該要有各自嘅功用同角色。通常application letter嘅定位係用嚟show你嘅manner，而CV就係show你嘅能力。Application letter作為你CV嘅summary，用嚟方便HR篩選，可以嘅話唔洗放太多細節，只需要放HR最關注嘅事情如expected salary、上一份工係做乜、轉工原因等（呢點要小心，如果你係職場初哥，最好唔好寫因薪金問題而轉工，避重就輕就可以）。另外，有應徵者習慣喺application letter內附上自己嘅照片，同樣地可免則免，因為每個人嘅審美眼光不一，如果一張相片帶來反效果嘅機會係大過正面效果的話，就冇必要冒險。

　　寫好application letter 同CV係重要，但每個行業、每間公司嘅應徵情況必定有異，所以每次搵工／見工前，都要為自己定一個最合適嘅策略，先係搵工第一件必要做的事。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票