【你夠膽嗎？】食昆蟲，其實唔難！

　　驟眼睇，你可能會覺得上圖只係一杯好普通嘅雲尼拿味雪糕，但其實呢杯係混入食用蟋蟀配方嘅營養雪糕，蛋白質比一般雪糕高，係新一代營養食品，亦係未來一個好大嘅商機。

　　隨著地球人口數量不斷增加，人類對食物嘅需求亦不斷增加，但同時間供生產食物嘅地方愈來愈少，生產速度亦減慢，再加上環境污染問題嚴重，數十年後極有可能出現糧食危機。所以早年外國已經有公司睇中呢個富潛力嘅市場，開始研究人類食用昆蟲，希望為糧食危機作準備。

　　當大部分人都未能接受進食昆蟲，除咗覺得污穢同可能有毒之外，亦認為食昆蟲呢個行為只會出現喺文明／文化水平較低嘅地方。但其實近年好多先進國家都開始有食昆蟲嘅習慣，外國公司「C-Fu」就睇到呢個商機，早幾年已經研究食昆蟲嘅可行性，時至今日已經創出多種食用產品同配方。產品主要係特製嘅食用磚、粉末同調味料，希望藉此減低進食原隻昆蟲嘅不安感。再配合食用磚不同嘅質地，來模擬出肉類相似嘅口感。

　　C-Fu有自己農場養殖昆蟲，飼養過程經過消毒以確安全，特製飼料養出來嘅昆蟲，除咗安全之外，仲可以養出零膽固醇嘅昆蟲，務求令有不同需要嘅用家都可以享用新一代食品。除咗C-Fu之外，仲有公司推出咗供家禽食用嘅昆蟲飼料，令家禽能夠吸收更高營養嘅食物。

　　經處理過嘅昆蟲原則上係可供食用，但營養方面又如何呢？對比同等份量嘅肉類計算，蟋蟀嘅蛋白質成份大約係豬肉嘅66%，但鐵質同鈣質則高出三倍／五倍多，但飼養蟋蟀嘅空間、資源同溫室氣體排放量就相對地少好多，成本效益非常之高。

　　雖然食昆蟲嘅好處多過壞處，但暫時呢方面嘅發展都十分慢，好多不同層面嘅問題需要解決後才能將其普及化，例如人／家禽長期食用後對DNA會否有所影響、長期食用會否中毒、文化問題及進食習慣等等。但相信時間會慢慢令問題得以解決，而商機就會漸漸變得更加清晰可見。 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【etnet 30周年】多重慶祝活動一浪接一浪，好禮連環賞！ ► 即睇詳情