涼茶老字號破格出啤酒，巿場有彈有讚！品牌開設副線產品，如何產生1+1=100效果？

　　當品牌去到一定成熟程度時，好多時會基於生意嘅考慮而開設副線業務，既可以從另一方向打出新血路，亦可以同主線產品產生synergy（協同效應），雙線互相幫助，帶來更大效果。去年歷史悠久嘅知名飲品品牌王老吉推出新副線業務，以新產品「吉啤」打進啤酒飲品巿場。吉啤主打由「純正德國技術」生產，力推飲後「不痛風，不頭痛，不長啤酒肚，營養豐富，美容養顏」等功效。巿場對王老吉「破格」生意策略有彈有讚，有人讚王老吉帶領啤酒行業走到另一個新方向，但亦有人評佢哋嘅策略出現多方面矛盾，長遠發展未必成功。

　　其實好多國際企業開設副線生意時，從生意策略角度上主要有兩個原因，一係希望以品牌概念相若嘅副線產品，去輔助主線生意，繼而產生synergy，所以副線產品多數係主線產品嘅橫向或直向延伸。例如MUJI Cafe會跟隨MUJI簡約生活嘅特質作品牌定位，而MUJI產品亦會融入Cafe當中，以飲食作媒介，令消費者更能感受到其品牌概念之餘，雙線生意亦能互相幫助。

　　另一原因係，因為主線生意能夠吸納嘅客源有限，會推出全新副線去吸納其餘客源，令企業能夠覆蓋更大嘅巿場佔有率。但亦因為咁，所以新副線品牌定位、產品命名、價格等多數同主線有所不同。

　　但王老吉今次嘅副線策略十分破格，從品牌上，雖然產品以「吉」命名，希望同主線拉上一定關連性，但實際上主副兩線喺品牌上關連性有點距離。另外，產品以「健康啤酒」作稱，但因王老吉多年來健康形象太深入民心，感覺上同啤酒有點對立，加上吉啤主打「德國技術」，同主線嘅中國老字號品牌有點落差，推出時難免會容易令人感到錯愕。

　　從生意上看，主副兩線亦並無產生「1＋1＝3」嘅synergy效果，雖然產品係由老字號王老吉推出，但因啤酒同涼茶本身關連不大，消費者未必會因為涼茶嘅好味／健康而加強對吉啤嘅消費，消費者大多係出於好奇而購買，副線難以跟隨著主線品牌效應而增加銷售或有助長線發展。

　　企業開設新產品或副線時，除咗要考慮新產品嘅商機外，亦要同集團旗下嘅業務／產品作配合，先能令新業務並非單一發展，而係1+1=100或更多。

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

第九屆「傳媒轉型大獎」請投etnet經濟通一票！► 立即行動