《Make Money》狗幣熱炒引Copycat，新款虛擬貨幣邊個有前景？

 　　「虛擬貨幣」最近成為搜索榜熱話，唔少新手都想透過購買虛擬貨幣一夜致富，但如果咁容易暴發，呢個世界邊到仲有窮人？比特幣、以太幣都講緊幾萬至幾十萬港紙一粒，所以今集《Make Money》就同大家介紹下啲比較新款又多人講嘅虛擬貨幣，等大家可以有多個參考。不過提醒返，虛擬貨幣波幅極大，大家買賣時候要量力而為，唔好賭身家咁玩啊！

 

(Shutterstock圖片)

 

狗類：狗狗幣、柴犬幣、秋田犬幣

 

(Shutterstock圖片)

 

　　「犬類貨幣」應該係近期最多人炒賣嘅虛擬貨幣，其中包括狗狗幣（Dogecoin）、柴犬幣（Shib）及秋田犬幣（AKITA）。呢堆犬幣都係來自網絡社區嘅笑話而起，特別經過特斯拉創辦人Elon Musk「加持」過之後，呢三款幣嘅幣價升幅快過火箭。其中狗狗幣係4月20日「狗狗幣紀念日」抽升，唔少「犬幣」fans揚言要將狗狗幣係5月31日前推上1美元；而呢種風氣亦推動埋柴犬幣及秋田犬幣上揚，當時柴犬幣一星期內升幅就達6.7倍，真係心血少都出事。

 

　　不過之後因為Elon Musk係週六夜現場（SNL）戲言狗幣係「騙局」之後，狗幣就大幅插水四成，而最近仲話特斯拉會暫停使用比特幣作為付款方式，因為佢認為挖掘比特幣消費大量能源並增加碳排放，又表示會使用其他更環保嘅虛擬貨幣。真係神又係Musk，鬼又係Musk，唔通佢係嚟「割韭菜」？

 

平台類：幣安幣（BNB）銷毀機制推高幣價

 

 (Shutterstock圖片)

 

　　自從Coinbase係美國上市後，唔少投資者都憧憬另一大平台幣安（BINANCE）會唔會走上同樣道路。不過更多人講嘅反而由幣安自行發行嘅虛擬貨幣「幣安幣」（BNB），有人認為，買入幣安幣等同買入幣安嘅股票，因為呢款幣本身有一個叫「銷毀制度」，幣安平台會用公司嘅純利購入市場嘅幣安幣，然後進行銷毀。情況有啲似上市公司回購股份之後進行註銷一樣，令到股本減少從而推高股價發展。

 

　　由於幣安並唔係上市公司，所以唔少人透過幣安銷毀嘅幣安幣來估算幣安年度純利。不過有唔少人認為幣安呢種銷毀方式同股票有雷同，會觸犯法律風險，所以之後更新規則，但好模糊咁話：「基於幣安交易量準則銷毀幣安幣」，但又無明確講述比例。不過無論點都好，幣安幣由40幾美元炒到上600幾美元，都算係一種潛力虛擬貨幣。

 

雲端類：Filecoin間接令雲端成本降低，預期幣價及使用量提升

 

 (Shutterstock圖片)

 

　　另一款近期比較多人講嘅就係Filecoin（FIL），亦都係交易平台比較多人交易嘅虛擬貨幣之一，由於全世界都講緊雲端儲存及運算，而Filecoin都係因為呢種原理而運行。Filecoin嘅獎賞機制係利用你電腦嘅多餘儲存空間出租而獲得，即係如果你個hardisk有多餘空間租畀人，你就會獲得相應嘅Filecoin獎勵；如果有客戶無論想睇文件、租空間，都要向「屋主」付出相應嘅coin先可以做到，形成一個循環。

 

　　而Filecoin嘅挖礦機制就係，假如你提供1TB嘅儲存空間，就會獲得Filecoin獎勵，同時你都要用返某個數量嘅Filecoin做「抵押」，假如你有一日唔想提供空間（挖礦），資料就會轉移，抵押金都會還返畀你。隨住雲端使用量上升，唔少人預計Filecoin會成為另外一種「實用性」貨幣，不論幣價同使用量都會提升，有一定前景！

 

撰文：李皆穎

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【你點睇？】上海有女子赴瑞士接受安樂死，引網民熱議。你是否支持安樂死？► 立即投票