香港街頭都上演軍演了。 

 

　　印尼總統佐科維多多訪港，香港政府又再一次如臨大敵，出動2000警力，反恐特勤隊繼上年張德江訪港之後再出動，更加首次有特勤隊員手持長槍喺市區巡邏，為維多多所到之處掃除安全威脅，有報道指出，今次警方亮出嘅係新配備嘅槍，直到好似閱兵咁款。

 

　　另外，唔少記者做採訪時都留意到，喺警方保護維多多嘅車隊當中，有一架訊號干擾車，實際上係爆炸品處理科嘅「防爆專車」，干擾爆炸品遙控器嘅同時，所到之處所有通訊網絡都停工，上唔到網。後來，有民航處從事空管嘅員工喺facebook爆料，干擾車喺太平山出沒時，連空管訊號都干擾埋。事關民航處喺太平山有空管基建，用作地對空通訊之用。干擾車一到太平山進行爆炸品遙控器偵測，就令到空管嘅通訊頻道出現強大嘅雜音，甚至巨響，一來令空管員耳仔受罪，二來隨時影響空管人員同機師嘅溝通。警方對此不置可否，民航處只係承認空管曾經有訊號干擾，無就此做進一步跟進。

 

　　搞咁大壇嘢，大敵當然唔係佐科維多多啦，而係威脅全球安全嘅恐怖組織伊斯蘭國。用反恐作為名義，的確係一個好洗好用嘅理由，喺香港今時今日嘅情況嚟睇，評估有恐襲風險都算係正常，穩陣啲啫。

 

　　好得意嘅係，今次大家都分析，警方醉翁之意不在酒，唔係真係最想為到保護佐科維多多，而係「志在七一」，為國家主席習近平嚟香港出席中國收返香港20年嘅「慶祝」活動做準備同演習。「點解呀？而家唔危險咩？又有得賴習大大呀？」

 

　　首先，唔係賴佢架。喺維多多到訪前，警方同政府向傳媒發放嘅訊息，都係話今次嘅部署就係「志在七一」，大家可以睇訪4月尾嘅報道。只係維多多之行完結之後，警方出嚟交代嘅話語就改變口風，強調同七月國家領導人到訪無關。可能佢哋都覺得阻到香港人生活呢。

 

　　另外，睇返過去一兩年，伊斯蘭國嘅威脅一直都存在，而期間係有其他外國政要到訪香港，例如去年9月，加拿大總理杜魯多訪港，當時並無見到警方咁大陣仗佈防。到11月，德國副總理到訪，同樣保安工作都係低調進行。歐美政要同東南亞回教國家政要嘅危險程度相比，唔係大相逕庭都起碼係不相伯仲，但警方並無「平等對待」，都難免畀人一種雙重標準之感。

 

　　我唔係話做反恐工作唔得，但係今次警方嘅佈防係不成比例地多，甚至乎，成為咗活脫脫嘅一次「軍事演習」，做成嘅情況就係為咗要同香港人「打定個底」，下個月習大大真係嚟嘅話，警方就可以更加放肆咁見縫插針，做出比起舊年「反張德江保安級別」，以及2011年李克強訪港更誇張嘅「反恐」保安措施。

 

　　中外領導人訪港待遇大不同，點只局限喺保安措施？歷年禮賓開支嘅數字，就透露出厚此薄彼係幾咁嚴重。

 

　　根據政府向立法會提供嘅數字，16/17年度 (截至2017年2月底) 港府接待中國國家領導人以及外國政要到訪嘅開支有707萬，當中580萬用咗喺張德江訪港。相比起過去2013至2016年3個財政年度，大增四至五倍，13/14年度係124萬、14/15年度係116.4萬、15/16年度係82.6萬。而其實香港接待嘅政要數目都係相若，大概喺150-200人左右徘徊。證明中國嘅領導人喺港府眼中，係重要過其他人好多。有趣嘅係，12/13年度係慶收返15週年，由於有一連串慶收返15週年活動，當年用咗1311萬，比啱啱呢年仲多。

 

　　號稱「國際大都會」，就嘗試吓對待中外「貴賓」公平返少少啦。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【與拍賣官看藝術】走進Sotheby's Maison睇睇蘇富比旗艦藝廊！蘇富比如何突破傳統成規？► 即睇