多謝叻哥呢餐！

　　我寫呢篇稿嘅時候，已喺阿根廷擊敗荷蘭嘅深夜，但仲未瞓得著！原因酒店仲有好多阿根廷籍球迷唱歌開P，入決賽當然令人興奮，但多得佢哋，其他住客都一齊唔使休息！

叻哥（左二）話荷蘭出局只係運氣唔好。

　　我喺四強戰同叻哥一齊做現場評述前，早將勝負先擺埋一邊。喂，唔係講風涼說話喎，阿根廷雖然係我心頭好，但入到4強其實已好滿意，決賽直頭係有交代之餘加喜出望外！

　　阿根廷同荷蘭都係鬥防守，明顯係「71國殤」後遺症，巴西輸德國1︰7已警惕兩隊「不求有功，但求無過」，120分鐘悶和互射12碼，是甘於接受嘅結果。阿根廷門將羅美路兩撲12碼成英雄，其實要多得荷蘭教頭雲高爾用盡換人名額，冇得再變魔術！

　　但阿根廷喺決賽面對如日方中嘅德國，大家都覺得捧盃機會都係細小小。我覺得德國實至名歸，佢哋嘅整體戰踢法比阿根廷仲流暢，阿根廷係決賽相信好似對荷蘭咁，唔會強攻求勝，寧願將主動權畀對方，雖然防守唔算好，但將士用命加上有美斯呢個變數，偷雞唔係冇可能！

　　我見各位香港球迷都議論叻哥捧荷蘭去到咁盡，其實佢喺咪後比起咪前更平靜，份人仲好nice添，輸波佢仲好大方請我地全team食自助晚餐。咁你話嘞，邊有人輸波仲請人食嘢架？所以要係呢度特別講聲：「多謝叻哥！」

轉載自晴報

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

【你點睇？】皇馬巴塞傳奇表演賽爆簽名會風波，26人買涉$20萬套票僅見部份球星15分鐘，你認為事件哪方須負較大責任？► 立即投票