三個月前，近年最大嘅黑天鵝現身，帶領住特朗普贏出美國總統選舉。以政治素人身份、狂人風格競選、口不擇言、四處點火，特朗普喺普選票輸近300萬票嘅情況下，仍然靠中部多個洲輕微取勝，而喺選舉人票大勝希拉里。 

 

　　佢當選後，言論一度偏向溫和，當大家，包括我，都以為佢會甘於現實制肘，做番一個比較循規蹈矩嘅總統，但事實證明，大家都太天真了。不過世事往往都係咁㗎啦，當特朗普成為咗史上最多人唔想佢實現競選承諾嘅總統，佢就真係「排除萬難」，做咗個「有為」嘅總統，正如你唔使等嗰架巴士會一次過嚟幾班，想等嗰架就好耐都唔嚟一樣。 

 

　　我有陣時喺度懷疑，特朗普而家喺做緊一場新媒體實驗，拍緊《The Global Apprentice》，全球人類都成為咗主角，佢嘅目標可能係成為全球最高收視嘅節目監製，如果喺咁嘅話，佢已經威盡全地球。需知道，特朗普最耍家嘅，就係爭取收視，就算喺佢而家已經貴為總統，佢都仍然關心佢個仔──《The Apprentice》名人版嘅電視收視，佢不滿喺現任主持阿諾舒華辛力加領銜之下，節目收視江河日下，阿諾就拍片搞笑回應，話自己有個好提議，「不如我同你交換份工，你嚟做主持，因為你係收視專家，我就去做你份工，等大家可以有覺好瞓！」在下舉腳贊成。

 

　　我都有另一個建議，白宮應該開番個電視節目，叫做《The Order》，特朗普每簽完一個行政命令，就講番一句「I Signed This, You Are Fired」。另外可以開個節目叫《推特天下》（Trump’s Marvelous Twitter），由特朗普自編自導自演，解說佢設計出每一個Twitter Post嘅時候嘅心路歷程。我肯定，未來4年，一定有好節目。

 

　　有傳媒總結咗從1980年代嘅列根開始，歷任美國總統用咗幾耐時間，令到民調當中反對自己出任總統嘅比率超越50%，平均要用2-3年時間達成，特朗普最威，用咗八日就解鎖成就。盤點吓部分特朗普嘅瘋狂事，佢喺上任前第一個記者會，對CNN記者高呼 “You Are Fake News.”；穆斯林禁令所透視嘅狹隘、不顧後果；決定真係建造墨西哥圍牆，要求人哋畀錢；又快刀斬去奧巴馬極力推動嘅TPP同埋醫改；甚至乎，喺有報道話，特朗普一直都懷疑11月嘅大選，佢自己唔應該喺普選票輸畀希拉里，認為選舉涉及一場龐大嘅造假 (Voter Fraud) ，難怪美國會有大批精神病醫生會懷疑佢有嚴重嘅精神病傾向，唔適宜擔當呢個職位。

 

　　就當佢冇任何精神疾病，特朗普每個行動，都顯示佢違背緊支撐民主嘅核心價值：自由、仁愛、包容，兩個月前講過，佢有成為「民主敵人」嘅趨勢，今日不幸言中，而似乎喺共和黨控制兩院嘅情況下，原本預期中嘅自我修復機制，都未能夠出現，轉化成喺美國各地對特朗普嘅大大小小示威、暴亂。大考驗當前，究竟美國呢個民主制度，會否就此沒落呢？

 

　　我唔敢答，但我見到中國好開心。而家特朗普未有如競選前所承諾，上任第一日就將中國列為貨幣操縱國，貿易戰如今亦尚未開打，但見得到內地官媒，尤其是環球時報網頁，日日攞特朗普嘅瘋言瘋語貼堂，講特朗普嘅題目數量，就嚟追得上習近平啲講話，就係為咗樹立起「民主不是好東西」、「美國民主是假的」旗幟，「咱們要對這些壞東西敬而遠之，橫竪人民選出來的，都一定是不好的。」

 

　　特朗普贏收視戰、習近平贏輿論戰，輸嘅，永遠都只有人民。

 

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

【香港好去處】etnet全新頻道盛大推出！全港最齊盛事活動資訊盡在掌握！► 即睇