有咩方法可以最快提升民望？玩fb？唔係。落區？唔係。唔做任何嘢？可能有用，但係唔係最快方法。呢幾個月嘅「選戰」，已經答咗大家，參加一場冇得贏嘅選舉，就係提升民意嘅捷徑。

　

　　曾俊華係其中一個受惠者，同時，佢係創造呢個局面嘅一個人。由舊年12月9號普天同慶689唔再連任，而689後備林鄭話要考慮參選開始，曾氏2.0曾俊華就變成低贏面嘅一個，但係佢以四両撥千斤嘅氣勢，不慍不火咁運用各種公關技巧，長期佔據民意榜首位，更加以建制官員嘅身分，但開明嘅外殼，成為民意嘅代表，破天荒獲得主流泛民嘅支持，即使而家佢能夠撼贏689 2.0嘅機會愈嚟愈低，佢已經贏晒。 

　

　　葉劉淑儀直情係大翻身。無錯，佢仍然係一粒葡萄，一粒望閘興嘆、未能圓夢嘅葡萄，但佢以前經常用眼淚攻勢，成為濕濡的葡萄，到今時今日「戰到最後一兵一卒」，變成堅強的葡萄，佢嘅轉變不容忽視，亦正如佢所講，反映出呢場選舉嘅荒謬。  

　

　　借用葉劉對689嘅形容，佢自己同曾俊華 ran a real campaign。 

　

　　由規劃政綱、組建競選辦班底、去到爭取支持(無論選委定市民)，曾俊華、葉劉、胡國興，以至689、曾蔭權等等等等，佢哋都有尊重呢場賽事，試圖力挽狂瀾，所以即使係689，喺呢方面都值得大家最基本嘅尊重。

　

　　反觀林鄭，佢可能係眾多面對選舉競爭嘅人入面，最cost-effective嘅一位，無政綱之下奪四五百票、拉票唔使自己拉、零公關，完美示範瞓喺度都贏。

　

　　所以佢可以好囂張咁張揚「我冇主動拉票」，一次係喺2月中，葉劉不開名批評有候選人已有足夠提名，但仍然四出搶票，令佢入閘無望，矛頭直指林鄭，當時無政綱嘅林鄭回應時話自己無主動爭取提名。另一次喺星期四，林鄭話有泛民選委好認同自己政綱嘅內容，只係佢喺提名期間無針對泛民主動拉票。唐英年上屆本來坐定粒六都未咁囂張。  

　

　　我從來無見過有人參選，會樂此不疲咁話你知，「噢，我冇做主動架，係啲票自己走埋嚟嘅」，林鄭係爭在未講埋下一句「其實我都唔想攞咁多票架，科科」。  

　

　　只不過，林鄭先係最聰明嘅。因為喺呢場從未開始，已經完結嘅選舉裏面，做咩都冇用。最重要嘅因素，係北京嘅頂頭人物首肯。事態亦愈嚟愈清楚，正如熟悉中國事務、有同北京官員傾談嘅時事評論員劉銳紹早前就撰文，強調北京只有一條路線，張德江等人係收order做嘢，「中央支持林鄭做特首」係源自習近平。

　

　　但係林鄭並唔係必勝喎，牌面上佢贏晒，但係佢嘅利用價值只係停留喺一個強力執行者嘅角色，會唔會佢無啦啦覺得，曾俊華喺做財經事務嘅經驗，可以幫到佢自己嘅路線呢？例如反貪、或者堵截大陸資金從香港流出？呢啲林鄭未必能夠應付得嚟，就要由一位熟悉相關事務嘅人做香港首長。

　

　　各路消息眾說紛紜，習近平嘅最終諗法，並唔會有人知道。所謂「還未開始，已經完結」，係因為眼前嘅根本唔係一場選舉，而只係深宮皇帝嘅鬥雞遊戲。

 

 

 《經濟通》所刊的署名及／或不署名文章，相關內容屬作者個人意見，並不代表《經濟通》立場，《經濟通》所扮演的角色是提供一個自由言論平台。

• 

《說說心理話》 消費能獲取快樂？買不起，不如花光錢錢$$？「習得性無助」有何影響？一起看看正確理財觀念。► 即睇