曇花一現的愛情：做第三者，就請放下幻想

　　「我係想同佢一齊。」

　　無限感慨不是失戀分手，他們是在一起卻從來見不得光，她是個小三。

　　「我好鍾意佢，我信佢對我都係真心架。」她語帶沉迷。

　　人夫配小三的組合聽得多，是大家對情愛看得開，還是消息靈通，幾乎習以為常了。小三這個角色，我從不會全盤討厭，該沒有人刻意將自己放在被唾罵的位置吧？！感情難有對錯，也許一時鬼迷心竅，走錯這步，要鬧小三，不如先鬧樂於一拖二，出軌不內疚的男人，不知足、心野、貪心，沒形容錯吧。

　　「我無諗過做小三，佢講過如果早啲識，佢一定揀同我一齊。」

　　「嘿，有無咁多早知。」

　　「我信佢鍾意我多過佢老婆架，俾啲時間佢揀，總有一日佢會離婚，同我一齊。」她繼續心懷希望。

　　相信對方的花言巧語，以為會有將來？已婚男人要個傻妹，平白不為錢不為名份，當然要說些甜言蜜語、好聽的大話，才能得手。當中的感情或有幾分真，但讓她繼續當小三也是真的。有今天沒明天的關係，本來就不該想多。

　　「我唔可以話佢對你係假，但唔好當真囉。」我淡淡的說。

　　萌生出軌之意有很多原因，對住老婆時間日久，苦悶、無新鮮感，追求刺激、年輕肉體...但離婚好煩的啊，要跟親朋戚友交待，又要分身家，還要毀掉多年來建立的「好男人」形象，偷食就夠啦，何必放上枱？！反正小三只是小三，一開始也不介意身份，投入其中，現在還能求甚麼？有老婆又有情婦，要安穩有安穩，要happy有happy，誰會破壞現有的齊人之福。

　　難以說小三都是壞人，或者愛上了也會情難自控，但明知這段關係假多過真，只有曇花一現的開心，就別相信、別幻想有將來，太傻只會令自己萬刧不復。