《小傳日記》終於可以廢寢忘餐炒美股喇！美國證交會(SEC)最新批准咗納斯達克交易所(Nasdaq)嘅「23/5」交易時段方案，以後休市一個鐘又開始新一日，預計今年12月6日就會開始。

　　日夜炒股制之後，Nasdaq會以每日21:00作為開盤新一日，直至第二日20:00收盤，再休市一個鐘後重新一日（禮拜六、日維持休市），21:00至04:00會叫「夜間時段」，04:00至20:00就叫「日間時段」，而日間時段同樣有盤前交易（04:00-09:30）同盤後交易（16:00-20:00）。至於NYSE Arca原先獲批22小時方案，但喺今年5月已提出改為23/5嘅新方案，同樣係每日21:00開市至隔日20:00收盤，亦即係無論係NYSE Arca或者Nasdaq上市，交易時段都會一致。

　　咁問題就嚟喇：如果同一隻美股可以喺唔同交易場所買賣，日後延長交易時間之後，究竟升跌幅應該點計？答案係：如果你想睇「今日正式交易時段相對昨日正式交易時段升咗幾多」，美東時間下午4點仍然係一個非常重要嘅分水嶺。但券商App點樣顯示「現價」同「升跌幅」，就要視乎佢採用邊套市場數據、計價及顯示方法。

　　美股股票目前一般係T+1結算，但隨住美股交易時間延長，DTCC（The Depository Trust & Clearing Corporation）旗下NSCC已經喺2026年6月底起將清算能力擴展至24x5，即星期日美東時間晚上8點開始，一直支援到星期五晚上8點，目的就係配合愈來愈長嘅股票交易時段，所以夜晚成交嘅股票唔需要等到第二朝9點半先至入系統。

　　除淨又點計？就算將來23/5交易實施，每日晚上8點至9點暫停交易，都唔代表晚上9點重新開市就等於開始另一個股息計算日。真正要睇嘅，係該隻證券適用嘅交易日期、結算日期、除淨日、股權登記日，以及公司行動規則。

　　至於業績同其他上市公司公告披露又點處理？要留意休市嗰一個鐘唔係專門畀上市公司公布業績或公告嘅窗口，上市公司仍然可以喺美東下午4點正常交易時段後公布業績同其他消息，換句話將，即使係當下，投資者已經可以喺盤後交易時段對公司消息作出即時反應，因此新制之下應該唔會帶來太多變化，最大改變係盤後交易完成後休市一個鐘，之後連接到夜間交易時段。

　　美股踏入全天候炒股時代，散戶係咪一定要日日較鬧鐘輪班炒足23個鐘，先可以同大鱷爭分奪秒搶肉食？我反而覺得未必，市面上有啲美股券商平台開放咗代理式交易（Agentic Trading）功能，容許客戶連接第三方AI代理，散戶可以用自然語言下達指令，由AI代理喺預設授權及風控框架下自動執行買賣，當然啦AI落錯單一樣係真金白銀，所以利用AI落盤之前更加要清楚知道佢究竟有咩權限、用咩策略、點樣控制倉位同風險，請請！

*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。