【相機食先】食客感覺重要過味道！ Food Design為食物重新定義

　　飲食業嘅競爭已經進入另一個階段，要脫離增長緩慢嘅情況，就必需放棄舊有嘅經營手法，以新科技同user experience 作藍本，先能夠開拓自己嘅藍海。

　　講到「Food Design」，大家可能只會諗到特色cupcake同卡通人物蛋糕等，但就好少會諗到新一代Food Design嘅另一面。其實Food Design二字喺外國已經出現咗好多年，最初因為飲食業競爭愈來愈大，單靠味道已經好難取勝，所以飲食業想用Food Design作為藍海策略。

　　早幾年初開始嘅時候，興起好多特色蛋糕，主要都係以卡通公仔或者像真景物為主題嘅蛋糕，配合不同顏色嘅食用糖漿同麵粉，加上師傅嘅創作力，令蛋糕喺節慶同婚宴市場上開拓一條出路。但可惜因為大多數人都認為呢類蛋糕只係「好睇唔好食」，所以熱潮好快就退卻，由食品變成陪襯品。

　　但從另一個角度睇Food Design呢門生意的話，除咗為食物化妝，令其外表更為吸引之外，其實仲有其他不同嘅意義。首先從食物內部出發，將食物嘅結構重新設計、開發新食材，之後製造出新類食物／食材，為大眾帶來新嘅味覺享受。而新類食物同時可以解決糧食短缺嘅問題，為食物敏感或有特別需要嘅病人提供多一個選擇，之前提及過嘅食用昆蟲就係一個好好嘅例子。

　　而另一個演繹Food Design嘅手法，就係從新定義／發掘食物嘅特質，再加以發揚光大。好似墨西哥連鎖快餐店Taco Bell咁，好多年前已經潮呢個方向進發。佢哋喺headquarter 自設咗Test Kitchen，專門研發新產品，每年會開發4000個新食物概念，當中有300-500個會嘗試推出到大眾市場。早幾年Taco bell 用咗一段較長嘅時間去研發新產品Quesalupa，味道好唔好味唔係重點，因為味道係十分個人嘅感覺，但佢哋今次嘅目的就係為咗賦予Quesalupa一個新特色。

　　Taco Bell從新製作食材組合，打造出可以「芝士拉絲」嘅Quesalupa。製作團隊希望令所有客人撕開Quesalupa嘅時候，都能夠做到「拉絲」嘅效果，令到只有廣告先能夠見到嘅事情，變成大眾嘅享受。要做到每個客人都可以「拉絲」並唔容易，所以佢哋花咗一段時間去進行測試，到最後效果嘅十分理想。當然，唔係所有人都對「拉絲」感興趣，因為Quesalupa拉唔拉絲，唔會影響食物本身嘅味道，所以「拉絲」對部分人嚟講冇乜意義。話雖如此，但呢種「拉絲效應」亦為公司帶來新生意，因為除咗視覺嘅享受之外，對好多「相機食先」嘅食客嚟講，將「拉絲」放上社交平台，係佢食飯前必做嘅事情，不停地有食客幫公司作免費宣傳，無形間成為咗一個極大嘅宣傳渠道，為生意帶來動力。

　　飲食業嘅競爭已經進入另一個階段，要脫離增長緩慢嘅情況，就必需放棄舊有嘅經營手法，以新科技同user experience 作藍本，先能夠開拓自己嘅藍海。