大台日日鋪天蓋哋宣傳「逼逼青路」，希望可以捧到個「網紅」出來生金蛋，計Jenny話，大台如果夠「吉士」，其實可以考慮邀請有「薯片叔叔」之稱嘅前財政司司長曾俊華加盟，皆因佢出親片唔理內容係咩都都吸到Like，可謂收視保證。話口未完，噚日佢又出片喇！唔通佢真心覺得唔從政做YouTuber呢條路諗得過？定為儲人氣鋪路？

「薯片叔叔」趁住9月10日世界防止自殺日，一身黑衣呼籲大家付出2小時，關心吓自己嘅朋友。

自己朋友自己救

　　 Jenny上個星期先講緊「薯片叔叔」曾俊華落選之後，似乎轉投民間攻勢去拍片，個勢似想做「網絡紅人」或者KOL。不過，佢都係悠閒慣，所以出片都唔算密，結果啱啱好隔咗兩個禮拜，佢先玩直播整餅，再幫一間NGO拍咗段片叫大家關心身邊朋友。

　　近日接連有後生仔女自尋短見，無論佢哋係咩身份、因為咩原因，Jenny睇見新聞時個心沉一沉，畢竟係一個年輕嘅生命就此消逝。噚日「薯片叔叔」就趁住9月10日世界防止自殺日，一身黑衣咁拍咗條分零鐘嘅片，仲分享咗喺佢自己嘅個人Facebook上面，原來係叫大家支持「2 Hours For A Life」呢個聆聽活動，呼籲大家付出2小時，關心吓自己嘅朋友，實行「自己朋友自己救」！薯片叔叔雖然淡出政壇，之不過仲係好留意社會嘅大小事咁噃！

再參選好「阿茂」？

　　要做YouTuber，又點只拍片咁簡單呢？除咗佢嘅個人帳戶有新片之外，星期六仲喺個粉絲專頁到開live，同田少齊齊整餅。嘩！連直播都玩埋，薯片叔叔果然好緊貼社交媒體嘅潮流！

　　話說薯片叔叔整緊餅嘅時候，有人就問佢會唔會(再)參選呀？薯片叔叔就答咗句：「好阿茂嘅問題！」Jenny聽完即刻問號黑人(下圖)上身，滿腦「即係點？」，依小妹解讀，唔通佢係話參選特首係「無嗰樣，整嗰樣」？即係佢跟本冇得再去選？

幾悶都有3000幾個Like

　　咁近日佔據各大新聞版面嘅「民主牆風波」有冇留意呀？佢又唔肯答！淨係話今日係整月餅喎！好啦，再問佢會唔會應田少嘅諗法整返個「3JT」，佢都係避談，不過就將個波射咗落曾前主席到，「佢(曾鈺成)都話唔洗搞」，都算開咗吓金口嘅。之後仲拉埋特首林鄭月娥落水，叫佢來學整餅順便學埋「修補撕裂」。

　　直播入面唔算有咩語出驚人嘅金句，而且都係睇住班大男人整餅，講真係幾悶㗎！但吸Like同吸心能力就極強，轉眼已3000幾個like、心心都有400幾個、嬲嬲就有2個。曾生如果有心做「網紅」有冇興趣去大台嘅「逼逼青路」度幫手呀？好過選特首啦！

兩個大男人整餅，都呃到3000幾個like。